काठमाडौं । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले प्रतिनिधिसभा विघटनको कदम राष्ट्र, जनता र लोकतन्त्रको हितमा नरहेको बताएका छन् । भरतपुर विमानस्थलमा सोमबार संचारकर्मीसँग कुरा गर्दै अध्यक्ष प्रचण्डले प्रधानमन्त्री ओलीले प्रतिनिधिसभा विघटन गरेर राष्ट्र र जनतालाई धोखा दिएको बताए ।
प्रचण्डले प्रधानमन्त्री ओलीले गर्न खोजेको निर्वाचन पनि नहुने दाबी गरे । प्रचण्डले भने, “चुनाव हुँदैन, प्रष्ट भए हुन्छ, यो चुनाव हुनका लागि गरिएको कदम नै होइन ।” लामो बलिदान र सङ्घर्षबाट प्राप्त उपलब्धि अहिले धरापमा रहेको जनाउँदै उनले संविधान र लोकतन्त्रको रक्षाका लागि नै आफूहरु आन्दोलनमा रहेको बताए ।
पूर्वप्रधानमन्त्री प्रचण्ड आज दिवङ्गत आफ्ना सम्धी भरतपुर महानगरपालिका वडा नं ७ निवासी नरबहादुर केसीप्रति श्रद्धाञ्जलि अर्पण गर्न यहाँ आएका हुन् । उनी काठमाडौं फर्किने कार्यक्रम छ । अध्यक्ष प्रचण्डले चितवनमा यही फागुन १२ गते हुने सभालाई सम्बोधन गर्नेछन् ।
प्रतिक्रिया