भैरहवा । नेपाली कांग्रेसका सभापति शेरबहादुर देउवाले निर्वाचन आयोगलाई निर्वाचनको तयारी अगाडी बढाउन आग्रह गरेका छन् । नेपाली कांग्रेसले रुपन्देहीको भैरहवामा आयोजना गरेको विरोधसभालाई सम्बोधन गर्दै सभापति देउवाले आयोगले निर्वाचनको कामलाई अगाडी नबढाएको गुनासो गरे ।
सभापति देउवाले संसद विघटनको मुद्दा सर्वोच्च अदालतमा विचारधिन रहेपनि अदालतले निर्वाचन आयोगको काम रोक्न नभनेको भन्दै आयोगको क्रियाकलाप शंकास्पद रहेको बताए । प्रधानमन्त्री ओलीले गत पौष ५ गते संसद विघटन गरेपछि संवैधानिक व्यवस्था अनुसार त्यसको ६ महिना भित्र निर्वाचन गराउनु पर्ने भएपनि त्यो अवस्थामा आयोग तयार नभएको देउवाको भनाई छ ।
देउवाले नेकपा विभाजन भएसँगै चुनाव चिन्हका बारेमा दुबै समूहबाट दाबी भएको अवस्थामा निर्वाचन आयोगले समयमै निर्णय गर्न नसकेको भन्दै आयोगको आलोचना गरे ।
देउवाले नेपालमा अवको शक्ति नेपाली कांग्रेस नै भएको दाबी गर्दै निर्वाचन जहिले भएपनि कांग्रेस कार्यकर्ताहरु चुनावका लागि तयारी रहन निर्देशन दिए ।
उनले वर्तमान सरकारलाई जनताको कुनै वास्ता नभएको बताए । उनले वर्तमान सरकारलाई ‘जनता मरून्, बाँचून्’ कुनै मतलब नभएको सभापति देउवाले बताए ।
‘कुनै बेला पनि चुनाव हुनसक्छ,’ उनले भने, ‘तर आयोगले अहिलेसम्म किन केही बोल्दैन ?’ नेकपाको विवाद पनि आयोगले छिटो टुंग्याउनुपर्ने देउवाले बताए । ‘नेकपाको विवाद टुंग्याउन अदालतको निर्णय कुर्नु पर्दैन’ देउवाले भने ।
प्रतिक्रिया