काठमाडौं । प्रतिनिधिसभा विघटन विरुद्धको मुद्दामा एमिकस क्यूरीको तर्फबाट राय दिने क्रम जारी छ ।
आज वरिष्ठ अधिवक्ता सतिसकृष्ण खरेलले राय दिँदै प्रतिनिधिसभा विघटन राजनीतिक नभई संवैधानिक विषय रहेको बताएका छन् ।
प्रधानमन्त्री केपी शर्मा ओलीले प्रतिनिधिसभा विघटन राजनीतिक विषय भएका कारण अदालतमा सुनुवाई गर्नै नहुने लिखित जवाफ संवैधानिक इजलासलाई दिएका थिए । वरिष्ठ अधिवक्ता खरेलले संविधान र राजनीति एक आपसमा जोडिने भएको जिकिर गर्दै यो विषयलाई राजनीतिक भन्न नमिल्ने तर्क गरे । खरेलले अदालतले राजनीतिक विषय भएकाले सुनुवाइ गर्दिनँ भनेको कुनै उदाहरण नरहेको पनि बताए ।
कसलाई मन्त्री नियुक्त गर्ने भन्नेमा प्रधानमन्त्रीको राजनीतिक निर्णय हुनसक्ने तर संसद् विघटन संवैधानिक विषय हुने खरेलको जिकिर थियो ।
एमिकस क्यूरीको तर्फबाट मंगलबार वरिष्ठ अधिवक्ता बद्रीबहादुर कार्कीले आफ्नो राय राखेका थिए ।
संवैधानिक इजलासले नेपाल बार एशोसिएसन र सर्वोच्च अदालत बार एशोसिएसनबाट पाँच जना एमिकस क्यूरी मगाएको थियो । एमिकस क्यूरीको राय सकिएपछि इजलासले आफ्नो फैसला सुनाउनेछ । गत माघ ४ देखि सर्वोच्चको संवैधानिक इजलासमा लगातार सुनुवाइ भइरहेको छ ।
प्रतिक्रिया