काठमाडौं । प्रचण्ड-नेपाल नेतृत्वको नेपाल कम्युनिष्ट पार्टी नेकपाले संसदीय दलको नेताबाट केपी शर्मा ओलीलाई हटाउने निर्णय गरेको छ ।
पार्टी कार्यालय पेरिसडाँडामा आज बसेको केन्द्रीय कमिटी बैठकले संसदीय दलको नेताबाट ओलीलाई हटाउने यसअघि गरेको निर्णयलाई अनुमोदन गरेको हो । बैठकले उपनेताबाट सुवास नेम्वाङलाई पनि हटाउने निर्णय गरेको छ ।
पार्टीको अन्तरिम विधान उल्लंघन गरेका कारण नेम्वाङलाई स्थायी कमिटीबाट समेत निलम्बन गरिएको छ । उनलाई तीन दिनभित्र उपनेताबाट राजीनामा गर्न निर्देशन दिइएको छ ।
यसैगरी बैठकले पार्टीका ६ जना केन्द्रीय सदस्यलाई विधान विपरित कार्य गरेको भन्दै केन्द्रीय सदस्यबाट निलम्बन गर्ने निर्णय गरेको छ । निलम्बित हुनेहरुमा प्रभु शाह, सूर्य थापा, गोकुल बाँस्कोटा, निरु पाल, शान्ता चौधरी, महेश बस्नेत रहेका छन् ।
यसैगरी, केही दिन अघि प्रधानमन्त्रीले मुख्य सचेतकको जिम्मा दिएका केन्द्रीय सदस्य विशाल भट्टराईलाई पनि केन्द्रीय सदस्यबाट निलम्बन गर्ने निर्णय बैठकले गरेको छ । उनलाई सांसदको जिम्मामा रहन सचेत गराउने निर्णय भएको छ ।
प्रतिक्रिया