स्पेनिस ला लिगा : बार्सिलोनाले महत्वपूर्ण जित दर्ता

काठमाडौं । स्पेनिस ला लिगा फुटबल अन्तर्गत शनिबार राति भएको खेलमा बार्सिलोनाले महत्वपूर्ण जित दर्ता गरेको छ ।

अवे मैदानमा भएको खेलमा बार्सिलोनाले ओसासुनालाई २-० ले पराजित गरेको हो । बार्सिलोनाको जितमा जोर्डी अल्बा र १८ वर्षे किशोर इलाइज मोरिबाले गोल गरे ।

दुवै गोलमा लियोनल मेस्सीले सहयोग गरेका हुन् । अल्बाले ३० औँ तथा मोरिबाले ८३ औँ मिनेटमा गोल गरेका हुन् । जितपछि दोस्रो स्थानको बार्सिलोनाको २६ खेलबाट ५६ अंक भएको छ ।

दुई खेल कम खेलेको शीर्ष स्थानको एथ्लेटिको मड्रिडको ५८ अंक र एक खेल कम खेलेको तेस्रो स्थानको रियल मड्रिडको ५३ अंक छ ।

ला लिगाका अन्तर्गत शनिबार राति भएका अरु खेलमा रियल भालाडोलिडले गेटाफे तथा एल्चीले सेभिल्लालाई समान २-१ तथा काडिजले एइबरलाई १-० ले पराजित गरेका छन् ।