बर्दिया । बर्दियामा एकसातामा दुईवटा नरभक्षी बाघलाई नियन्त्रणमा लिईएको छ । गत बुधबार एउटा जवान पाटे बाघ नियन्त्रणमा लिएको बर्दिया राष्ट्रिय निकुन्जको प्राविधिक टोलीले बिहिबार पुनः अर्को बयस्क नरभक्षी बाघ नियन्त्रणमा लिएको हो ।
मधुवन नगरपालिकाको सामुदायिक वन क्षेत्रबाट अर्को नरभक्षी पाटे बाघलाई नियन्त्रणमा लिइएको निकुन्जले जनाएको छ । राष्ट्रिय प्रकृति संरक्षण कोष र बर्दिया राष्ट्रिय निकुञ्जको प्राविधिक टोलीले बिहिबार दिउँसो करिब १४ वर्ष उमेरको बयस्क भाले पाटे बाघलाई नियन्त्रणमा लिएको हो।
मधुवन नगरपालिका-३ स्थित खाता जैविक मार्गको गौरी सामूदायिक वनमा डार्ट (बेहोस बनाउने सुई प्रहार) गरेर नरभक्षी बाघलाई नियन्त्रणमा लिइएको बर्दिया राष्ट्रिय निकुन्जका सहायक संरक्षण अधिकत असिम थापाले जानकारी दिएका छन् ।
गत बुधबार पनि बर्दिया राष्ट्रिय निकुञ्ज क्षेत्रमा पर्ने गेरुवा गाउँपालिका-४ को ड्याङपुर सामुदायिक वन क्षेत्रबाट एउटा नरभक्षी बाघ नियन्त्रणमा लिइएको थियो।
एक साताअघि मधुवन नगरपालिका-३ कोठियाघाटकी २७ वर्षीया रेनुका सुनारलाई बाघले मारेपछि निकुञ्जले त्यस क्षेत्रमा आठवटा क्यामेरा जडान गरेको थियो। ब्यामेराको कैदमा पटक पटक बाघ देखिएपछि प्राबिधिक टोलीले डार्क गरेर बाघ नियन्त्रणमा लिएको थियो ।
निकुञ्ज प्रशासनले समातिएका दुबै बाघलाई बर्दिया राष्ट्रिय निकुञ्जको खोरमा राख्ने तयारी गरेको छ।
प्रतिक्रिया