चीनद्वारा नेपाललाई कोरोना विरुद्धको खोप हस्तान्तरण

काठमाडौं । कोभिड–१९ विरुद्धको खोप चीन सरकारले नेपाललाई उपलब्ध गराएको आठ लाख मात्रा (डोज) सोमबार नेपाल सरकारलाई हस्तान्तरण गरिएको छ ।

प्रधानमन्त्री निवास बालुवाटारमा आयोजित कार्यक्रममा नेपालका लागि चिनियाँ राजदूत हाउ याङ सीले प्रधानमन्त्री केपी शर्मा ओलीलाई सो खोप हस्तान्तरण गरेकी हुन् । राजदूत यान्छीले नेपाललाई उपलब्ध गराएको खोपसम्बन्धी दस्ताबेज पनि प्रधानमन्त्री ओलीलाई हस्तान्तरण गरेकी हुन् ।

त्यसअवसरमा प्रधानमन्त्री केपी शर्मा ओलीले खोप सहयोगले नेपाल र चीनबीचको मैत्री सम्बन्ध थप मजबुद बनाएको बताएका छन् ।

यसैगरी राजदूत यान्छीले भ्याक्सिनलाई विश्वव्यापी सार्वजनिक सम्पत्ति बनाउने राष्ट्रपति सी चिनफिङको प्रतिबद्धताको कार्यान्वयन भएको बताएकी थिइन् । यान्छीले
खोप हस्तान्तरण कार्यक्रम नेपाल र चीनबीच जनताको स्वास्थ्यप्रतिको प्रतिबद्धताको प्रतिकसमेत रहेको धारणा राखेकी थिइन् ।

चिनियाँ अनुदानको खोप आजै बिहान नेपाल एयरलाइन्सको विमानले बेइजिङबाट काठमाडौं ल्याएको थियो ।