काठमाडौं । नेकपा एमालेको नेपाल पक्षले छुट्टै संगठन विस्तार तथा सुदृढीकरणसम्बन्धी अभियान संचालन गर्ने भएको छ । नेपाल पक्षले तयार पारेको संगठन विस्तार तथा सुदृढीकरण सम्बन्धी कार्यक्रमको भोलि (शनिबार) घोषणा गर्ने भएको छ । सो पक्षको आज बसेको स्थायी समितिको बैठकले राष्ट्रिय भेलाबाट पारित भएको ‘राजनीतिक प्रतिवेदन’लाई तल्लोतह सम्मका कार्यकर्तामाझ लैजाने समेत निर्णय गरेको छ ।
नपाले पक्षको शुक्रबार बसेको बैठकले गत चैत ४ र ५ गतेको राष्ट्रिय कार्यकर्ता भेलाको निर्णय कार्यान्वयन गर्दै ‘संगठन विस्तार तथा सुदृढीकरण अभियान’लाई अगाडि बढाउने निर्णय गरेको हो ।
नेपाल पक्षका नेता योगेश भट्टराईका अनुसार राष्ट्रिय कार्यकर्ता भेलामा प्रस्तुत भएको अवधारणामा १० वटा टोलीबाट आएको सुझावलाई समेटेर तयार भएको ‘राजनीतिक प्रतिवेदन’माथि भोलिको बैठकले अन्तिम रुप दिने र देशभर लैजाने निर्णय भएको छ ।
बैठक भोलि पनि बस्ने कार्यक्रम रहेको भट्टराईले बताए ।
आजको बैठकले पार्टी उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेमाथि गरिएको कारबाहीको विरोध गरेको छ । कारबाही पार्टीको नवौं महाधिवेशनबाट पारित विधान विपरीत र पूर्वाग्रही भएको निष्कर्ष बैठकले गरेको भट्टराईले जानकारी दिए
एमाले अध्यक्ष केपी शर्मा ओलीले बिहीबार नेताद्वय भुसाल र पाण्डेलाई पार्टी सदस्यबाट ६ महिना निलम्बन गर्ने निर्णय गरेका थिए । ओलीले वरिष्ठ नेता माधवकुमार नेपाल र उपाध्यक्ष भिम रावललाई सय अघि नै ६ महिना सदस्यबाट निलम्बन गरिसकेका छन् ।
प्रतिक्रिया