माओवादी केन्द्रको स्थायी समिति बैठक स्थगित, जसपासँग वार्ता गर्दै

काठमाडौं । नेकपा माओवादी केन्द्रको स्थायी समिति बैठक स्थगित भएको छ । बिहान ११ बजे बस्ने भनिएको बैठक अन्तिम समयमा आएर स्थगित भएको हो ।

अधिकांश स्थायी समिति सदस्यहरु काठमाडौं बाहिर भएका कारण बैठक स्थगित गरिएको माओवादी केन्द्रले जनाएको छ । यद्यपी, जनता समाजवादी पार्टी जसपासँग शिर्ष नेतृत्वले सत्ता साझेदारीबारे छलफल गर्ने भएपछि बैठक स्थगित गरेको बताइएको छ ।

आजको बैठकमा सरकारलाई दिएको समर्थन फिर्ता गर्ने र काँग्रेस एवं जसपासँग मिलेर प्रधानमन्त्री केपी शर्मा ओली विरुद्ध अविश्वासको प्रस्ताव दर्ता गर्ने विषयमा छलफल गरिने बताइएको थियो ।

शनिबार मात्रै कांग्रेसले सरकारको राजीनामा मागेर आफ्नो नेतृत्वमा सरकार बनाउन पहल गर्ने निर्णय गरेको थियो । जसपाको पनि बहुमत सदस्यहरुले ओलीलाई समर्थन नगर्ने संकेत गरेका छन् ।