बुटवल । बुटवलमा पहिलो काइरोप्राक्टिक एण्ड म्यानुअल थेरापी सेन्टर (सिएमसी) सञ्चालनमा आएको छ ।
काठमाडौंको त्रिपुरेश्वरमा मुख्य कार्यालय रहेको सेन्टरको बुटवलमा बुधबारबाट शाखा सेन्टरको रुपमा सञ्चालनमा आएको छ । नँयावर्षको अवसरमा पुर्व क्रिकेट खेलाडी शक्ति गौचनले सिएमसीको उद्घाटन गरेका हुन ।
कार्यक्रमको प्रमुख अथिति समेत रहेका उनले थेरापी सेन्टर सञ्चालनमा आएपछि यस क्षेत्रका विरामीले लाभ लिन सक्ने बताए । म्यानुअल थेरापी विधिबाट औषधीको प्रयोग बिना बिरामीको उपचार हुने भएकाले हाड जोर्नी तथा नशासम्बन्धी बिरामीले बुटवलमै उपचार गर्न पाउने गौचनले बताए ।
सिएमसी प्रालीका अध्यक्ष तथा न्यूरो फिजियोथेरापिस्ट डा। तेन्जिङ्ग नोर्वु लामाले पक्षघात, नशा च्यापिएको, अन्य कुनै पनि हाड जोर्नी सम्बन्धि समस्याका बिरामीलाई लक्षित गरि यस सेन्टर सञ्चालन गरेको बताए ।
उनले काइरोप्राक्टिक म्यानुअल थेरापी विधिबाट उपचार गरिने बताए । यस पद्धतिबाट उपचार गर्दा औषधी र अप्रेशनको प्रयोग नहुने जानकारी दिए ।
दुर्घटनाबाट घाईते भएर अपाङ्गता भएका व्यक्तिहरुको पनि सरल तरिकाले सेन्टरमा उपचार हुने उनले बताए । सेन्टरमा दैनिक ७० जना बिरामीको उपचार गर्न सकिने काइरोप्राक्टिक एण्ड म्यानूअल सेन्टरका म्यानेजिङ्ग डाईरेक्टर नविन खरेलले जानकारी दिए ।
लुम्बिनी प्रदेशका १२ वटै जिल्लाका सेवाग्राहीले बुटवलमा आएर सजिलै सेन्टरबाट लाभ लिन सक्ने उनले बताए । काइरोप्राक्टिक एण्ड म्यानूअल पद्धतिबाट उपचार गर्ने उपत्यका बाहिर पहिलो रहेको खरेलले बताए ।
प्रतिक्रिया