रामेश्वर थापाको घरमा ओली-नेपाल वार्ता

काठमाडौं । नेकपा एमालेका अध्यक्ष एवं प्रधानमन्त्री केपी शर्मा ओली र एमालेका वरिष्ठ नेता माधवकुमार नेपालबीच भेट भएको छ ।

काठमाडौंको बुढानिलकण्ठ चपलीस्थित अन्नपूर्णपोष्ट दैनिकका सञ्चालक रामेश्वर थापाको घरमा भेटवार्ता भएको हो । एमाले पार्टीभित्रको विवाद सांसदहरुको सामुहिक राजीनामाको अवस्थामा पुग्दै गरेको बेलामा अध्यक्ष ओली र नेता नेपालबीच भेटवार्ता भएको हो ।

एमालेको नेपाल खनाल पक्षले पार्टीलाई जेठ २, २०७५ अघिको अवस्थामा फर्काउनुपर्ने शर्त राखेको छ । अपरान्ह ४ बजेसम्म माग पुरा नभए सामुहिक राजीनामा दिने अल्टिमेटम सो पक्षले राखिरहेको छ ।

सांसदहरुले राजीनामा दिए आफ्नो सरकार गिर्ने भएका कारण पनि अध्यक्ष ओली र उनी निकट नेताहरुले नेपाल खनाल पक्षलाई फकाउन प्रयास जारी राखेका छन् । बिहीबार बिहान मात्रै अर्थमन्त्री विष्णु पौडेल ओलीको सन्देश लिएर नेपाललाई भेट्न उनकै निवास पुगेका थिए ।

एमालेको बिहान बसेको स्थायी कमिटी बैठकले नेता नेपालसहित भीम रावल, घनश्याम भुसाल र सुरेन्द्र पाण्डेको निलम्बन फिर्ता गरेको थियो । यसअघि ओलीले चार नेताले अरुको एजेण्डा बोेकेर एमाले ध्वंस गर्न लागेको भन्दै ६ महिनासम्म पार्टीको साधारण सदस्यताबाट समेत निलम्बन गरेका थिए ।