काठमाडौं । केपी शर्मा ओली नेतृत्वको सरकार विस्थापन गर्ने या नगर्ने विषयमा जनता समाजवादी पार्टीभित्रको विवाद उत्कर्षमा पुगेको छ ।
ओलीलाई समर्थन गरिरहन चाहेका जसपाका एक अध्यक्ष महन्ठ ठाकुरले आफु पक्षीय सांसदहरुलाई अर्का अध्यक्ष उपेन्द्र यादव पक्षमा लाग्न नदिन भक्तपुरको रिसोर्टमा पुर्याएका छन् । सांसदहरुलाई रिसोर्टमा पुर्यायउन अध्यक्ष ठाकुर नेता राजेन्द्र महतो आफैले नेतृत्व गरेका छन् ।
ठाकुरले बबरमहलस्थित पूर्व राजपाको कार्यालयमा भेला पारेर १३ जना सांसदहरुलाई भक्तपुर पुर्याएका हुन् । ठाकुर पक्षसँग १७ जना सांसद रहेको दाबी गरिएको छ । उनीनिकट बाँकी सांसदलाई पनि बोलाइएको छ ।
जसपामा अर्का अध्यक्ष उपेन्द्र यादव पक्षले ओली सरकारलाई विस्थापित गरी कांग्रेस नेतृत्वको नयाँ सरकार बनाउन समर्थन गर्ने जनाइसकेको छ ।
पार्टीको केन्द्रीय कार्यकारिणी समितिमा अल्पमतमा रहेका ठाकुर र नेता राजेन्द्र महतोले राष्ट्रपति विद्यादेवी भण्डारीलाई भेटेर आफु नै प्रथम अध्यक्ष भएका कारण यादवको प्रस्ताव अस्वीकार गर्न आग्रह गरेका छन् । तर यादव पक्षले भने पार्टीमा कुनै प्रथम र द्वितीय अध्यक्ष नभएको भन्दै विधान बमोजिम बहुमतको निर्णयलाई सबैले मान्नुपर्ने अडान राख्दै आएको छ ।
यादव पक्षले बहुमत केन्द्रीय सदस्य र बहुमत सांसदहरुको समर्थनमा नयाँ सरकारको लागि अगाडि बढ्ने योजना बनाइसकेको छ ।
प्रतिक्रिया