काठमाडौं । जनता समाजवादी पार्टीभित्रको विवाद पुनः सतहमा आएको छ । अध्यक्षद्वय महन्थ ठाकुर र उपेन्द्र यादवद्वारा पार्टी एकताको पक्षमा संयुक्त वक्तव्य जारी भएको केही समय नवित्दै सहमति भाँडिएको सन्देश जाने गतिविधि देखिएको छ ।
अध्यक्ष ठाकुरले वैशाख ३० गते संसदीय दलको बैठक बसेर दलको नेतामा राजेन्द्र महतोलाई चयन गरेको पत्र संसद सचिवालयमा दर्ता गराएपछि अर्का अध्यक्ष यादवले त्यसको काउन्टर गरेका छन् ।
यादवले संसद सचिवालयलाई जेठ २ गते नै पत्र पठाउँदै हालसम्म जसपा संसदीय दलको नेता कोही पनि चयन नभएको जनाएका छन् ।यादवले संसदीय दलको विधान कार्यकारिणीबाट अनुमोदन हुनुपर्नेमा हालसम्म संसदीय दलको विधान नबनेको र कार्यकारिणीबाट अनुमोदन पनि नभएको बताएका छन् ।
यादवले दलको नेता चयन भएको भनेर कसैले जानकारी गराएको भए त्यसलाई वैधानिकता नदिन सचिवालयलाई आग्रह गरेका छन् । अर्का अध्यक्ष ठाकुरको पत्र सचिवालयमा दर्ता भएपछि यादवको पत्र सार्वजनिक भएको हो ।
प्रतिक्रिया