धनगढी । सुदुरपश्चिम प्रदेशका मुख्यमन्त्री त्रिलोचन भट्टले विश्वासको मत लिँदैछन् । आज बिहान ९ बजे बस्ने प्रदेशसभा बैठकमा मुख्यमन्त्री भट्टले विश्वासको मत लिन लागेका हुन् ।
आइतबार नेकपा एमालेका सांसद पठान सिंह बोहोराले प्रदेशसभा बैठकलाई सम्बोधन गर्दै मुख्यमन्त्रीलाई विश्वास नरहेको बताएका थिए । त्यसपछि भट्टले सोमबार नै विश्वासको मत लिने योजना बनाएका थिए । तर नियमानुसार सोमबार नमिलेपछि भट्टले आज विश्वासको मत लिन लागेका हुन् ।
बिहान ९ बजे बस्ने प्रदेशसभा बैठकमा विश्वासको मत लिने कार्यतालिका रहेको प्रदेशसभा सचिवालयका सचिव रामसिंह धामीले बताएका छन् ।
प्रदेशसभा सचिवालयले यसका लागि सबै तयारी गरिकेको छ । विश्वासको मतको पक्ष, विपक्ष र तटस्थमा छुट्टाछ्ट्टै मत खसाल्ने व्यवस्था मिलाइएको छ ।
५२ सदस्यीय प्रदेशसभामा विश्वासको मत प्राप्त गर्न २७ मत हासिल गर्नुपर्छ । प्रदेशसभामा नेकपा एमाले सबैभन्दा ठूलो दल हो । एमालेका सभामुखबाहेक २४ सांसद रहेका छन् ।
एमालेभित्र मुख्यमन्त्रीलाई समर्थन नगर्ने र गर्ने विषयमा विवाद छ । पार्टी केन्द्रमा देखिएको विभाजनको असर प्रदेशसभा संसदीय दलमा पनि परिसकेका छ । माधव नेपाल पक्षले मुख्यमन्त्री भट्टलाई समर्थन दिने जनाएको छ । नेपाल पक्ष सरकारमा सहभागी छ । तर, पार्टीको संस्थापन ओली पक्षले भने समर्थन फिर्ता लिएको छ । माधव पक्षमा १५ जना सांसद रहेका छन् । ओली पक्षमा ६ जना रहेका छन् । पहिला माधव पक्षमा रहेका ३ जना सांसद अहिले पार्टी विवादमा तटस्थ रहेका छन् ।
प्रतिक्रिया