देउवाले आज पनि केन्द्रीय सदस्यहरुलाई भेट्दै, महाधिवेशनमा सहयोगको याचना

काठमाडौं । नेपाली कांग्रेसका सभापति शेरबहादुर देउवाले आज पनि केन्द्रीय सदस्यहरुसँगको भेटघाटलाई निरन्तरता दिने भएका छन् ।

आगामी महाधिवेशनमा पुनः सभापतिमा उठ्न लागेका देउवाले आज तीन वटा प्रदेशबाट प्रतिनिधित्व गर्ने केन्द्रीय सदस्यहरुसँग भेट गर्न लागेका हुन् । कांग्रेसको महाधिवेशन आगामी भदौ १६ गतेदेखि १९सम्म हुने मिति तय भएको छ ।

गत शनिबारदेखि केन्द्रीय नेताहरुसँग भेटघाट गरिरहेका देउवाले आज लुम्बिनी, कर्णाली र सुदुरपश्चिम प्रदेशका केन्द्रीय सदस्यहरुसँग छलफल गर्नेछन् । सबै केन्द्रीय सदस्यहरुलाई देउवाले आफ्नो निवास बुढानिलकण्ठ बोलाएका छन् । भेटघाटमा देउवाले आफुलाई सभापतिमा सहयोग गर्न आग्रह गरेका छन् ।

देउवाले आइतबा बागमती र गण्डकी प्रदेशका केन्द्रीय सदस्यसँग कुराकानी गरेका थिए । यस्तै शनिबार प्रदेश १ र २ का आफु निकट केन्द्रीय सदस्यसँग कुराकानी गरेका थिए। आफ्नो समुहबाट विमलेन्द्र निधि र संगठन विभाग प्रमुख गोपालमान श्रेष्ठले समेत सभापतिको उम्मेदवार बन्ने घोषणा गरेपछि देउवा दबाबमा परेका छन् ।

केन्द्रीय नेताहरुसँगको भेटमा देवाले अझै एक कार्यकाल पार्टीको नेतृत्व आफुले गर्ने बताउँदै सहयोगको आग्रह गरेका छन् । देउवाले आफु निकट सबै केन्द्रीय सदस्यहरुसँग छलफल गरेपछि उनीहरुको सुझावलाई समेत मनन गर्दै थप रणनीति बनाउन लागेका छन् ।