१४९ जनाको हस्ताक्षर राष्ट्रपति कहाँ, १४६ हस्ताक्षर सर्वोच्चमा भएपछि शेरबहादुरजी प्रधानमन्त्री हुनु पर्दैन ? : प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले केही दिनमा नेपाली कांग्रेसका सभापति शेरबहादुर देउवा प्रधानमन्त्री हुने बताएका छन्।

विपक्षी गठबन्धनका शीर्ष नेताहरुले शनिबार पत्रकारहरुसँग गरेको छलफलमा प्रचण्डले राष्ट्रपति कार्यालयमा १४९ र सर्वोच्च अदालतमा १४६ सांसदको हस्ताक्षर प्रस्तुत भएको बताउँदै अव केहि दिनमा देउवा प्रधानमन्त्री बन्ने दाबी गरे । उनले प्रधानमन्त्रीले आफूलाई देखाएर अदालतलाई धक्याउन थालेको बताउँदै आफूले नबोलेको कुरा पनि बोलेको भनेर प्रचार गरिएको बताए । ‘मैले संविधानअनुसार अदालतले पक्कै गर्छ भनेको हुँ । अहिले पनि भन्छु, संसद पुनर्स्थापना हुनुपर्छ, प्रधानमन्त्री शेरबहादुर देउवाजी नै हुनुपर्छ ।’प्रचण्डले भने, ‘१४९ जनाको हस्ताक्षर राष्ट्रपति कहाँ छ, १४६ जनाको हस्ताक्षर सर्वोच्चमा । अनि शेरबहादुरजी प्रधानमन्त्री हुनु पर्दैन ?’

संविधानको धारा ७६[५] सांसदहरुको विशेषाधिकारका रुपमा राखिएको भन्दै प्रचण्डले अदालतले संविधान अनुसार निर्णय गर्छ भन्ने विश्वास रहेको बताए । उनले अघि भने, ‘केपी अहिले पनि अदालतलाई धम्क्याउन थालेका छन्, थर्काउन थालेका छन् । ’