काठमाडौं । विपक्षी गठबन्धनले आज समाजमा विभिन्न क्षेत्रमा क्रियाशिल व्यक्तित्वहरुसँग अन्तर्क्रिया गर्दैछन् ।
दिउँसो २ बजे डाक्टर, इन्जिनियर, प्रोफेसर र वरिष्ठ अधिवक्ताहरूसँग गठबन्धनका शीर्ष नेताले अन्तर्क्रिया गर्न लागेका हुन् ।
अन्तक्र्रिया कार्यक्रम संसदभवनको ल्होत्से हलमा हुने भएको छ । आज नागरिक समाजका अगुवा, लेखक बुद्धिजीविहरुसँग अन्तर्क्रिया गर्ने भनिएको भएपनि त्यसलाई बुधारबार सारेर डाक्टर इन्जिनियर, प्रोफेसर र वरिष्ठ अधिवक्ताहरुसँग अन्तर्क्रिया हुन लागेको हो ।
अन्तर्क्रियामा कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, एमाले वरिष्ठ नेता माधवकुमार नेपाल, जसपा अध्यक्ष उपेन्द्र यादव र राजमो उपाध्यक्ष दुर्गा पौडेल लगायतका नेताको सहभागिता हुनेछ ।
यसअघि गठबन्धनले संचारमाध्यमका सम्पादक र राजनीतिक बिटमा काम गर्ने संचारकर्मीहरुसँग अलगअलग अन्तर्क्रिया गरिसकेका छन् ।
प्रतिनिधिसभा विघटन विरुद्ध कानूनी र राजनीतिक संघर्षमा उत्रिने निर्णय गरेको गठबन्धनले केही दिन अघि संघर्षको कार्यक्रमकै स्वरुपमा विभिन्न क्षेत्रका व्यक्तित्वहरुसँग अन्तर्क्रिया गर्ने घोषणा गरेको थियो ।
सर्वोच्च अदालतमा गठबन्धनका नेता शेरबहादुर देउवा सहित १४६ सांसदले दायर गरेको रिटमाथि सुनुवाइ भैरहेको छ । अदालतमा सुनुवाइ जारी रहेका बेला गठबन्धनले प्रतिनिधिसभा विघटन विरुद्ध निरन्तर दबाब बढाउँदै गएको छ ।
प्रतिक्रिया