काठमाडौं । नेकपा एमाले दशौं महाधिवेशन आयोजक कमिटीको बैठक भोलि बुधबार बस्दैछ । बैठकमा माधवकुमार नेपाल समुहका नेताहरुलाई पनि निम्ता पठाइएको छ ।
प्रधानमन्त्री निवास बालुवाटारमा बस्ने बैठकमा नेपाल पक्षका नेताहरुलाई बोलाइए पनि नेपालसहित ११ जना नेतालाई भने बोलाइएको छैन ।
नवौं महाधिवेशनबाट निर्वाचित सबै केन्द्रीय कमिटी सदस्यहरुलाई निमन्त्रणा पठाइएको कार्यालय सचिव शेरबहादुर तामाङले बताएका छन् ।
नेता नेपाल, झलनाथ खनाल, भीम रावलसहित ११ जना नेतालाई अध्यक्ष केपी शर्मा ओलीले पार्टीको साधारण सदस्य समेत नरहने गरी कारवाही गरेका छन् ।
महाधिवेशन आयोजक कमिटीको बैठकले सो कमिटी खारेज गर्दै जेठ २, २०७५ को पूर्ववत कमिटी पुनर्स्थापित गर्ने बताइएको छ । माधव नेपाल समुहले जोडदार रुपले उठाउँदै आएको एमालेको पूर्ववत कमिटीकै बैठक बोलाउँदा सो समुहका सबै नेताहरु उपस्थित हुने ओली पक्षको बुझाइ रहेको छ ।
तर, सोमबार मात्रै नेता माधवकुमार नेपाललाई निम्नस्तरको गाली गरेर ओलीले सो समुह प्रतिको दृष्टिकोण भने प्रष्ट पारेका छन् । सर्वोच्च अदालतले दशौं महाधिवेशन आयोजक कमिटीलाई मान्यता नदिएपछि बाध्यतावस पूर्ववत कमिटीको बैठक बोलाउन बाध्य भएको नेपाल पक्षको बुझाइ रहेको छ । ओली यसरी बैठक बोलाएपनि तत्कालै सोही बैठकमार्फत पुनः महाधिवेशन आयोजक कमिटीमा सदस्यहरु थपेर पहिले जस्तै बनाउने सो समुहले आशंका गरेको छ ।
प्रतिक्रिया