काठमाडौं । प्रतिनिधिसभा विघटन विरुद्ध परेको रिटमाथि संवैधानिक इजलसामा सभामुख पक्षका वकिलले बसह सुरु गरेका छन् ।
प्रधानन्यायाधीस चोलेन्द्र शमशेर जबराको नेतृत्वमा रहेको पाँच सदस्यीय इजलासमा सभामुख अग्निप्रसाद सापकोटाको पक्षबाट आज दुई घण्टामा पाँच जना वकिलले बहस सक्दैछन् ।
बहसको थालनी अधिवक्ता मेघराज पोखरेलले गरेका छन् । सभामुखका तर्फबाट वरिष्ठ अधिवक्ताहरु लवप्रसाद मैनाली, श्याम खरेल, उपेन्द्रकेशरी न्यौपाने र अधिवक्ताहरु मेघराज पोखरेल र श्रीकृष्ण सुवेदीले बहस गर्दै छन्।
रिट निवेदहरुले सभामुख सापकोटालाई विपक्षी बनाएपनि उनले पनि प्रतिनिधिसभा विघटन असंवैधानिक भएको जिकिर गर्दै बहस नोट बुझाइसकेका छन् । त्यसैले महान्यायाधिवक्ताले सभामुख पक्षलाई जम्मा एक घण्टाको समय दिएपछि वकिलहरुले असन्तुष्टि जनाएका थिए । त्यसपछि इजलासले थप एक घण्टाको समय दिएको थियो ।
सभामुख पक्षको बहस सकिएपछि रिट निवेदकका तर्फबाट जवाफी बहस सुरु हुनेछ । इजलासले यसका लागि ३ घण्टा समय तोकेको छ । जवाफी बहस सकेपछि चार जना एमीकस क्यूरीले दुई घण्टाभित्र राय दिनेछन ।
त्यसपछि इजलासले फैसलाको मिति तोक्नेछ ।
प्रतिक्रिया