जसपा विवाद निरुपण गर्न निर्वाचन आयोगबाट ५ सदस्सीय इजलास गठन

काठमाडौं । निर्वाचन आयोगले जनता समाजवादी पार्टी (जसपा) भित्र देखिएको विवादको निरुपण गर्न ५ सदस्सीय इजलास गठन गरेको छ ।

आज (बुधबार) बसेको आयोगको पदाधिकारीहरुको बैठकले सर्वाेच्च अदालतको संवैधानिक इजलासको सिको गर्दै प्रमुख आयुक्त दिनेश थपलियाको नेतृत्वमा पाँच सदस्यीय इजलास गठन गरेको छ । दुबै पक्षको विवादको सुनुवाइका लागि आयोगले आगामी साउन ३ गते आइतबार दुवै पक्षलाई बोलाउने निर्णय गरेको छ । आयोगले पठाएको पत्रमा पार्टीका आधिकारी प्रतिनिधि वा कानुन व्यवसायी राख्ने भए कानुन व्यवसायीलाई साथै लिएर आउन भनिएको छ ।

जसपाको उपेन्द्र यादव पक्षले राजनीतिक दलसम्बन्धी ऐन २०७३ को दफा ४४ अनुसार पार्टीको आधिकारिकता विवाद टुंग्याउन माग गर्दै आयोगमा निवेदन दिएको थियो । सोही प्रकृतिको अर्को निवेदन लिएर महन्त-राजेन्द्र पक्ष पनि आयोग पुगेपछि जसपाको विवाद आधिकारीकरुपमा आयोगमा प्रवेश गरेको थियो ।