एमाले सांसदको नारावाजी, होहल्ला र तोडफोडका बीच गण्डकीको बजेट पारित

पोखरा । प्रमुख प्रतिपक्षी दल नेकपा एमालेको विरोधका बीच गण्डकी प्रदेशको बजेट पारित गरिएको छ ।

प्रदेशसभाको आजको बैठकमा एमालेको अवरोधका बीच प्रदेश सरकारले ल्याएको आर्थिक वर्ष २०७८/७९को बजेट पारित भएको हो ।

नियमित कार्यसूचि अनुसार बजेट पारित गर्न बसेको बैठकको सुरुमै एमाले सांसदले रोष्टम घेराउ गर्दै नारावाजी गरेका थिए । आफ्नो सरकार हुँदा ल्याएको बहुवर्षीय योजना काटिएको आरोप लगाउँदै एमालेले केही दिनदेखि प्रदेशसभाको बैठक अवरुद्ध गर्दैआएको थियो ।

अर्थमन्त्री समेत रहेका कृष्णचन्द्र नेपाली पोखरेलले होहल्लाकै बीचमा बजेट पारित गर्न प्रस्ताव गरेका थिए । त्यसपछि थप आक्रोशित बनेका एमाले सांसदहरुले टेवल उठाएर फ्याँकेका थिए । सांसदहरुले मर्यादापालकसँग केही बेर धकेलाधकेल समेत गरेका थिए ।