जसपाको ठाकुर पक्षमा रहेका ५ सांसदद्वारा उपेन्द्र यादवलाई समर्थन, यादवको पक्षमा १७ सांसद पुगे

काठमाडौं । जनता समाजवादी पार्टी जसपाको महन्थ ठाकुर पक्षमा लागेका पाँच सांसद उपेन्द्र यादव पक्षमा खुलेका छन् ।

ओली सरकारलाई समर्थन गर्ने या नगर्ने विषयमा विवाद हुँदा ठाकुरको पक्षमा २० जना सांसद उभिएका थिए । ओली सरकारलाई समथर्न गर्दै सरकारमा पनि सहभागी हुने भएपछि ठाकुरको पछि लागेका सांसदहरु प्रतिनिधिसभा पुनर्स्थापना भएपछि पुनः यादव पक्षमा लागेका छन् ।

ठाकुर समुहमा रहँदै आएका अमृता अग्रहरी, प्रमोद साह, रानी मण्डल, नरमाया ढकाल र रुही नाज शनिबार यादव पक्षले बोलाएको संसदीय दलको बैठकमा सहभागी भएका छन् । लोकतान्त्रिक प्रणाली निमोठ्न खोज्ने केपी ओलीको पक्षमा महन्थ ठाकुर लागेका कारण आफुहरु यादव पक्षमा लागेको सांसद प्रमोद साहले बताएका छन् ।

निर्वाचन आयोजमा जसपा अधिकारिकताको विवाद चलिरहेको छ । पार्टीको कार्यकारिणी समितिमा प्रष्ट बहुमतमा (३१ सदस्य) रहेको यादव पक्ष अब पाँच जना सांसद थपिएपछि संसदीय दलमा समेत ५० प्रतिशत भन्दा बढी हैसियतमा पुगेको छ । जसपाका ३२ सांसदमध्ये यादवसँग १२ जना मात्र रहेका थिए । अब संसदीय दलमा यादवसँग १७ सांसद पुगेका छन् । थप एक जना सांसद पनि आफ्नो पक्षमा आउने यादव पक्ष्ले जनाएको छ ।