काठमाडौं । सरकारले ७ वटै प्रदेशको प्रदेश प्रमुखहरु परिवर्तन गर्ने अभ्यास शुरु गरेको छ । सत्ता पक्षीय गठबन्धनको सुझाव र प्रदेशका सत्ता पक्षीय पार्टीहरुको मागलाई ध्यानमा राख्दै प्रदेशका प्रमुख परिवर्तन गर्ने तयारी गरेको सत्ता निकट उच्च स्रोतले दाबी गरेको छ । स्रोतका अनुसार सत्तारुढ गठबन्धन भित्र दलगत भागवण्डा समेत मिलिसकेको र सम्भवत आज बस्ने मन्त्रिपरिषदको बैठकले प्रदेश प्रमुख परिवर्तन गर्ने निर्णय गर्ने छ ।
पहिलो चरणमा प्रदेश नम्बर २, गण्डकी प्रदेश र लुम्बिनी प्रदेश प्रमुखलाई हटाउने र अर्को चरणमा बाँकी प्रदेशका प्रदेश प्रमुखहरुका बिषयमा निर्णय गर्ने सहमति भएको बताईएको छ । प्रदेश सरकारबाट प्रदेश प्रमुखहरुको दुरुपयोग भएको र ओली सरकारले पुर्वाग्रह राखेर परिवर्तन गरिएका ३ प्रदेशका प्रदेश प्रमुखहरुलाई पहिलो चरणमा हटाउने सरकारको तयारी रहेको सत्तापक्षीय गठबन्धनका एक नेताले पुष्टि गरेका छन् ।
आज बस्ने मन्त्रिपरिषद् बैठकले औपचारिक निर्णय हुन सक्ने ती नेताले बताए । प्रधानमन्त्री देउवाले मन्त्रिपरिषद् बैठक ३ बजेका लागि बोलाएका छन् ।
ओली नेतृत्वको मन्त्रिपरिषद्को सिफारिसमा राष्ट्रपति विद्यादेवी भण्डारीले प्रदेश २ मा राजेश अहिराज, गण्डकी प्रदेशमा सीता कुमारी पौडेल र लुम्बिनी प्रदेशमा धर्मनाथ यादवलाई नियुक्त गरेकी थिईन् । तीनै जना प्रदेश प्रमुखहरुको क्रियाकलाप निश्पक्ष नभएको र दलगत स्वार्थका आधारमा काम गरेको सत्ता पक्षको ठहर छ ।
हाल प्रदेश १ मा सोमनाथ प्यासी, प्रदेश २ मा डा.राजेश झा अहिराज, बागमती प्रदेशमा विष्णु प्रसाई, गण्डकीमा सीता कुमारी पौडेल, लुम्बिनीमा धर्मनाथ यादव, कर्णालीमा गोविन्द कलौनी र सुदूरपश्चिममा गंगाप्रसाद यादव प्रदेश प्रमुख छन् ।
प्रतिक्रिया