जसपा विवादबारे महन्थ ठाकुरको रिट निवेदन न्यायाधीशद्वय खतिवडा र चुडालको इजलासमा

काठमाडौं । जनता समाजवादी पार्टी नेपालको आधिकारिकताका विषयमा निर्वाचन आयोगको निर्णय विरुद्ध जसपाकै महन्थ ठाकुर पक्षले दायर गरेको रिट सर्वोच्च अदालतका न्यायाधीशद्वय ईश्वरप्रसाद खतिवडा र डा. कुमार चुडालको संयुक्त इजलासमा परेको छ ।

जसपाको अध्यक्षका हैसियतले महन्थ ठाकुरले निर्वाचन आयोगको आधिकारिकतासम्बन्धी प्रक्रिया रोक्न माग गर्दै रिट निवेदन दिएका थिए । ठाकुरले पार्टीको कार्यकारिणी समितिमा आफुले थपेका सदस्यहरुलाई आधिकारिता दिनुपर्ने माग गरेका थिए ।

उनले त्यसका विवाद निरूपण नगरी निर्वाचन आयोगले पुरानो कार्यसमितिलाई मान्यता दिएर बहुमत र अल्पमतको परीक्षण गर्न थालेको भन्दै त्यसलाई रोक्न माग गरेका थिए । सो रिटमाथि सर्वोच्चले न्यायाधीशद्वय खतिवडा र चुडालको संयुक्त इजलासमा पेसी तोकेको हो ।

यसअघि सर्वोच्चले सो रिटमाथि यही साउन १० गते प्रारम्भिक सुनुवाइ गर्दै अन्तरिम आदेश जारी गरिरहन नपर्ने ठहर गरेको थियो । त्यसको भोलिपल्ट सोमबार निर्वाचन आयोगले जसपाको उपेन्द्र यादव पक्षलाई आधिकारिक मान्यता दिइसकेको छ ।