काठमाडौं । सत्ता गठबन्धनको कार्यदल बैठक आज पनि बसेको छ ।
प्रधानमन्त्री निवास बालुवाटारमा बिहान ९ बजेदेखि बसेको बैठकमा सरकारको न्यूनतम साझा कार्यक्रमलाई अन्तिम रुप दिन लागिएको छ ।
कार्यदलले तयार पारेको प्रस्ताव आजै शीर्ष नेतृत्वलाई हस्तान्तरण गर्ने र आजै सो कार्यक्रममा हस्ताक्षर भै सार्वजनिक गर्ने तयारी भैरहेको कार्यदलका एक सदस्यले बताएका छन्। यसका लागि गठबन्धनका शीर्ष नेताहरुको बैठक पनि बस्दैछ ।
यसअघि सोमबार बिहान बसेको बैठकले सरकारको न्यूनतम साझा कार्यक्रमको खाका तयार पारेको थियो । सरकारको नीति तथा निर्णयलाई प्रभावकारी बनाउनका लागि सत्तारूढ दलले न्यूनतम कार्यक्रम बनाएका हुन् ।
कार्यक्रममा मुलुकको अर्थतन्त्र, भूराजनीतिक अवस्थितिबारे सरकारको दृष्टिकोण, संविधान संशोधन र नागरिकता ऐनमा सरकारको प्रतिवद्धता, कोरोना महामारी र यसको रोकथाम एवं राहतसम्बन्धी सरकारको नीतिलगायतका विषयहरूलाई समेटिएको छ ।
यसका लागि कांग्रेसका महामन्त्री पूर्णबहादुर खड्काको नेतृत्वमा कार्यदल क्रियाशील छ। सदस्यहरुमा कांग्रेसबाट रमेश लेखक र डा. मिनेन्द्र रिजाल, माओवादी केन्द्रबाट देव गुरुङ र वर्षमान पुन र जसपाबाट महेन्द्र राय यादव र राजेन्द्र श्रेष्ठ रहेका छन् ।
न्यूनतम साझा कार्यक्रम सार्वजनिक भएपछि मात्रै मन्त्रिपरिषद् विस्तार हुने बताइएको छ ।
प्रतिक्रिया