अपहरण र शरीर बन्धकको आरोप खेपेका मुख्यमन्त्री पोखरेल भन्छन् -‘प्रतिपक्षले आज सत्ता पक्षलाई अपहरणको आरोप पनि लगाए’

बुटवल । सांसद अपहरण गरेर बन्धक बनाएको आरोप खेपेर काठमाडौं पुगेका लुम्बिनी प्रदेशका मुख्यमन्त्री शंकर पोखरेलले प्रदेशमा विपक्षीका कारण ८७ सदस्सीय प्रदेशसभा ८० मा सिमित भएको आरोप लगाएका छन् । प्रदेशसभा सदस्य विमला कुमारी खत्री वलीले मुख्यमन्त्रीले आफुलाई ५ दिन बन्धक बनाएर राखेको आरोप लगाएकै दिन काठमाडौ पुगेर मुख्यमन्त्री पोखरेलले ८७ सदस्सीय प्रदेशसभालाई विपक्षीका कारण ८० सदस्यमा झरेको आरोप लगाएका हुन् ।

काठमाडौं पुगे लगत्तै सामाजिक सञ्जालमा लेख्दै पोखरेलले दुईजना माननियलाई फकाएर राजिनामा गराउन सक्ने, ६ जनालाई अनुशासनुको डण्डा चलाएर निष्कासन गर्न सक्ने र एकजना माननियलाई दल परिवर्तन गराउन सक्ने प्रतिपक्षले आज सत्तापक्षलाई अपहरणुको आरोप लगाएको बताएका छन् । उनले सामाजिक सञ्जालबाटै ८७ सदस्यिय प्रदेशसभा कस्का कारणले ८० सदस्यमा झर्यो ? भनेर प्रश्न समेत गरेका छन् । उनले फेसबुकमा लेखेका छन्, -‘८७ सदस्यिय प्रदेशसभा कस्का कारणले ८० सदस्यमा झर्यो ? इतिहासले उत्तर अवश्य खोज्नेछ ।’

लुम्बिनी प्रदेशमा दाङ र कपिलवस्तुबाट सभामा प्रतिनिधित्व गर्ने २ जना प्रदेशसभा सदस्यले राजीनामा दिएका थिए भने ३ जना जसपा सांसद पार्टी निर्देशन विपरित मन्त्री खान गएकाे अभियाेगमा र ३ जना माओवादी केन्द्रबाट एमाले प्रवेश गरेकाहरु दलत्यागको अभियोगमा पद मुक्त भएका थिए । त्यसैगरि सांसद विमला वली मुख्यमन्त्री पोखरेलकै योजनामा दाङबाट फकाउँदै ल्याएर ५ दिन मुख्यमन्त्री कार्यालयमा राख्दा समेत एमाले बन्न नमानेर भागेर माओवादी पार्टी सम्पर्कमा पुगेकी थिईन् ।