बुटवल । आफ्नो सत्ता जोगाउन सबै उपाय अपनाउँदा पनि सत्ता जोगिने अवस्था नदेखिएपछि लुम्बिनी प्रदेशका मुख्यमन्त्री शंकर पोखरेल राजीनामाको मनस्थितीमा पुगेका छन् ।
बहुमतका लागि आवश्यक सांसदको संख्या जुटाउने प्रयास असफल भएपछि र सर्वोच्चबाट समयावधि भित्र आदेश पनि जारी हुने अवस्था नदेखिएपछि पोखरेल राजीनामाको मनस्थितीमा पुगेका हुन् ।
राजीनामाको मनस्थितीमा रहेका पोखरेलले मंगलबार नै प्रमुख सचिवलाई बोलाएर राजीनामा दिने संकेत गरेको स्रोतले दाबी गरेको छ । त्यसैगरि मुख्यमन्त्री पोखरेलले सचिवहरुलाई आज बिहान बोलाएर मन्त्रीहरुको कुनै निर्णयहरु सदर गर्न छुट भएको भए गराउन निर्देशन दिएको पनि स्रोतले जनाएको छ ।
यसअघि मुख्यमन्त्री कार्यालयमा बस्ने गरेको मन्त्रिपरिषदको बैठक पनि निवासमा बोलाएका पोखरेलले राजीनामा पछि एमालेले खेल्ने भुमिकाका विषयमा र कार्यकालमा सहयोग गर्ने मन्त्रिपण्डलका सदस्यहरुलाई धन्यवाद दिएको बताईएको छ ।
संसदीय दलको बैठकमा पनि उनले घुमाउरो पाराले राजीनामा दिने संकेत गरेको एक एमाले सांसदले बताए । बैठकमा राजीनामाका बिषयमा कुनै कुरा नउठेको एमाले संसदीय दलका मुख्य सचेतक भुमिश्वर ढकालले बताए ।
बैठकपछि संचारकर्मीसँग कुरा गर्दै मुख्य सचेतक भूमिश्वर ढकालले प्रदेशसभामा उपस्थित हुने या बहिस्कार गर्ने या के गर्ने भन्नेबारेको सबै निर्णय गर्ने अधिकार संसदीय दलको नेतालाई दिइएको बताए ।
ढकालले प्रदेशसभा सचिवालयले विगतको परम्परा तोडेको आरोप लगाए । उनले भने, ‘कार्यव्यवस्था परामर्श समितिको बैठक समेत बोलाइएको छैन । अहिलेम्म के विषयम छलफल हुँदैछ भन्ने जानकारी हामीलाई दिइएको छैन । अब हामी गर्ने भन्नेबारे छलफल गर्दैछौं ।’
मुख्यमन्त्री शंकर पोखरेल विरुद्ध अविश्वासको प्रस्तावमाथि आज दिउँसो १ बजे छलफल गर्ने गरी प्रदेशसभाको विशेष अधिवेशन बोलाइएको छ । सर्वोच्च अदालतले १ बजे अघि नै अधिवेशन स्थगित गर्ने अन्तरिम आदेश जारी नगरेरमा विशेष अधिवेशन स्वतः अघि बढ्नेछ । प्रदेशसभामा मुख्यमन्त्री पोखरेल अल्पमतमा रहेका छन् ।
प्रतिक्रिया