ओली विरुद्ध मातृका यादवको आपत्तिजनक अभिव्यक्ति रेकर्डबाट हटाउन सभामुखको रुलिङ

काठमाडौं । प्रतिनिधिसभा बैठकमा नेकपा एमालेका अध्यक्ष एवं पूर्वप्रधानमन्त्री केपी शर्मा ओली विरुद्ध माओवादी केन्द्रका सांसद मातृका यादवले दिएको अभिव्यक्ति हटाउन सभामुखले रुलिङ गरेका छन् ।

बिहीबारको बैठकमा सांसद यादवले ओली विरुद्ध आपत्तिजनक अभिव्यक्ति दिएको भन्दै एमाले सांसदहरुले चर्को विरोध गरेपछि सभामुख अग्निप्रसाद सापकोटाले उनका केही अभिव्यक्ति रेकर्डबाट हटाउन रुलिङ गरेका हुन् । यादवले ओलीमा मेन्टल्ली र फिजिकल्ली समस्या रहेको बताएका थिए ।

शुक्रबार बैठक सुरुहुनासाथ एमाले संसदीय दलका प्रमुख सचेतक विशाल भट्टराईले यादवको अभिव्यक्तिको विराधे गरेका थिए ।

भट्टराईले यादवले संसदमा बोलेको कुराले संसदीय मर्यादा भंग गरेको बताएका थिए । यादवले बोलेको कुरा रेकर्डबाट हटाएर संसदको गरिमा कायम गर्न उनले माग गरे । त्यसपछि सभामुख सापकोटाले यादवको विवादित अभिव्यक्ति संसदको रेकर्डबाट हटाउन सचिवालयलाई निर्देशन दिएका हुन् ।