मोटरसाईकलको ठक्करबाट प्रहरी निरिक्षकको मृत्यु भएको सम्बन्धमा गृहमन्त्रालयले बनायो छानविन समिति

नवलपरासी (पश्चिम) । मोटरसाइकलको ठक्करबाट प्रहरी निरीक्षक कपिल वाग्लेको मृत्यु भएको घटनाको छानबिनका लागि गृह मन्त्रालयले समिति गठन गरेको छ । साउन २५ गते नवलपरासी (पश्चिम) बर्दघाट नगरपालिका–४ स्थित इलाका प्रहरी कार्यालय अगाडि लु १४ प ८७५८ नम्बरको मोटरसाइकको ठक्करबाट मृत्यु भएका प्रहरी निरिक्षक वाग्लेको मृत्यु सम्बन्धमा छानविन गर्न गृह मन्त्रालयका सहसचिवको संयोजकत्वमा समिति गठन भएको हो ।

दुर्घटनाका सन्दर्भमा स्थलगत अध्यन गरी सत्यतथ्य छानबिन गर्न गृहमन्त्रीस्तरीय निर्णयले मन्त्रालयका सहसचिव सुनिल खनालको संयोजकत्वमा तीन सदस्यीय समिति गठन भएको गृहमन्त्रालयले प्रेस विज्ञप्ति प्रकाशित मार्फन जानकारी दिएको छ ।

राष्ट्रिय अनुसन्धान विभागका निर्देशक लक्ष्मण गुरुङ र नेपाल प्रहरीका प्रहरी वरिष्ठ उपरीक्षक सुदिप गिरी सदस्य रहेको समितिलाई १० दिनभित्र प्रतिवेदन पेस गर्न भनिएको गृहमन्त्रालयको विज्ञप्तिमा उल्लेख छ ।

यही साउन २५ गते नवलपरासी (पश्चिम) बर्दघाट नगरपालिका–४ स्थित इलाका प्रहरी कार्यालयअगाडि लु १४ प ८७५८ नम्बरको मोटरसाइकले ठक्कर दिँदा इलाका प्रहरी कार्यालयमा कार्यरत तनहुँ निवासी प्रहरी निरीक्षक वाग्ले गम्भीर घाइते भएकोमा उनको उपचारका क्रममा भैरहवा मेडिकल कलेजमा मृत्यु भएको थियो । प्रहरी निरिक्षक काफ्लेकाे मृत्युकाे विषयमा संघीय संसदमा समेत सांसदहरुले प्रश्न उठाएका थिए ।