६ वटा प्रदेशले पायो माओवादी केन्द्रका ६ नयाँ इन्चार्ज

काठमाडौं । नेकपा माओवादी केन्द्रले प्रदेश इन्चार्जहरुको हेरफेर गरेको छ । आइतबार पार्टी केन्द्रीय कार्यालय पेरिसडाँडामा बसेको स्थायी कमिटी बैठकले ६ वटा प्रदेशमा इन्चार्जहरूको हेरफेर गरेको हो । यस अघि रहेका इन्चार्जहरु मध्य कोही सरकारमा सहभागी भएको र केही एमाले प्रवेश गरेका कारण जिम्मेवारीमा नयाँ नेतृत्व चयन तथा हेरफेर गरिएको मओवादी केन्द्रले जनाएको छ ।

बैठकले प्रदेश २ मा गणेश साह, बागमतीमा हितमान शाक्य, गण्डकीमा हितराज पाण्डेलाई इन्चार्ज तोकेको छ । त्यसैगरि बैठकले कर्णालीको इन्चार्ज शक्ति बस्नेत, लुम्बिनीमा चक्रपाणी शर्र्मा र सुदूरपश्चिममा खगराज भट्टलाई इन्चार्जको जिम्मेवारी दिइएको छ । माओवादी केन्द्रका प्रवक्ता नारायणकाजी श्रेष्ठका अनुसार प्रदेश १ को इन्चार्जमा सुरेन्द्र कार्की र सावित्री काफ्लेमध्ये एक जनालाई प्रदेश १ को इन्चार्ज बनाइने विषयमा छलफल भएपनि टुङ्गो लागेको छैन ।

बैठकले छरिएर रहेका कम्युनिष्ट घटकहरुसँग सम्बाद गर्ने र एकठाँउमा ल्याउने प्रयत्न गर्ने पनि निर्णय गरेको प्रवक्ता श्रेष्ठले बताए ।