प्रचण्डको घोषणा : अहिलेकै अवस्थामा एमसीसी पास हुँदैन

खबर कुरा
२२ भाद्र २०७८, मंगलवार
                 

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले तत्कालै एमसीसी पास नहुने दाबी गरेका छन् ।

मंगलबार पार्टीको रणनीतिक सहायक संगठन योङ कम्युनिष्ट लिग नेपाल (वाईसीएल) को पहिलो केन्द्रीय समिति बैठकलाई सम्बोधन गर्दै अध्यक्ष प्रचण्डले
नेपालले सोधेका प्रश्नको जवाफ अमेरिकाले नदिएसम्म एमसीसी पास नहुने बताएका हुन् ।

प्रचण्डले राष्ट्र र राष्ट्रियतामाथि उठ्ने प्रश्नमा माओवादी केन्द्रले सहमति नजनाउने स्पष्ट पारे । उनले भने, ‘हामीले एमसीसीबारे अमेरिकालाई कुटनीतिक नोट पठाएका छौँ, त्यसको जवाफ आएन । जवाफ नआएपछि एमसीसी पास हुने कुरा हुँदैन ।’

अध्यक्ष प्रचण्डले अहिलेको शासन प्रणालीमाथि प्रश्न उठिरहेकाले माओवादीले त्यसबारे सोच्नुपर्ने बताए । उनले आगामी पुसमा हुने पार्टीको राष्ट्रिय सम्मेलनसँगै नयाँ आन्दोलनको आँधीबेहरी सिर्जना गर्नुपर्ने अवस्था आउने बताउँदै त्यसका लागि तयारी गर्न आग्रह गरे । प्रचण्डले वाईसीएललाई एकीकृत र एकढिक्का भएर अघि बढ्न निर्देशन दिए ।

प्रचण्डले पार्टी संसदवादमा फस्दै गएकोमा चिन्ता समेत व्यक्त गरे ।

यसैबीच वाईसीएलले केन्द्रीय कमिटीबाट संयोजक र सहसंयोजक तोकेको छ । मंगलबार बसेको केन्द्रीय समिति बैठकले संयोजकमा सुमन देवकोटा चयन भएका छन् भने सहसंयोजकमा सुबोधराज शेर्पाली चुनिको हो । बैठकले केन्द्रीय कमिटीलाई राष्ट्रिय सम्मेलन आयोजक समितिमा रुपान्तरण गरेको छ । केही दिनअघि सम्पन्न राष्ट्रिय भेलाले वाईसीएलको कन्द्रीय समिति चयन गरेको थियो । तर, नेतृत्वमा विवाद भएका कारण अध्यक्षसहितको पदाधिकारी चयन गर्न सकेको थिएन ।

 

 

यसमा तपाइको मत

Your email address will not be published. Required fields are marked *


*