काठमाडौं । भारतको सत्तारुढ दल भारतीय जनता पार्टी भाजपाको निमन्त्रणामा नेपाली कांग्रेसको प्रतिनिधिमण्डल भारत भ्रमणमा जाने भएको छ ।
कांग्रेस सहमहामन्त्री एवं पूर्वपरराष्ट्रमन्त्री प्रकाशशरण महतको नेतृत्वमा तीन सदस्यीय प्रतिनिधिमण्डल नयाँ दिल्ली जान लागेको हो ।
भारतसँग सम्बन्ध सुधारका लागि नेपालको मुख्य सत्तारुढ दल कांग्रेसको टोलीले नयाँ दिल्लीमा राजनीतिक भेटभाट गर्नेछ । भाजपाका विदेश विभाग प्रमुख डा. विजय चौथाइवालाको निमन्त्रणामा जान लागेको प्रतिनिधिमण्डलमा उदय शमशेर जबरा र अजय चौरसिया रहेका छन् । दुई पार्टीबीचको सम्बन्ध समधुर र सशक्त बनाउनका यो भ्रमण हुन लागेको कांग्रेस सहमहामन्त्री डा. महतले बताएका छन् ।
भारतमा महत नेतृत्वको प्रतिनिधिमण्डलले भारतीय विदेशमन्त्री एस जयशंकर, भाजपा अध्यक्ष जेपी नड्डा, राष्ट्रिय महासचिव अरुण सिंह लगायतलाई भेट गर्ने कार्यक्रम रहेको छ ।
भारतले पछिल्लो केही समययता नेपालमा राजनीतिक हस्तक्षेपकै हैसियतमा विगतमा जस्तै सक्रियता देखाइरहेको अवस्थामा नेपाली कांग्रेसका नेताहरुको भ्रमण हुन लागेको हो । यसका लागि भाजपाका विदेशविभाग प्रमुख चौथाइवालाले निकै मेहनत गरेका छन् । गतवर्षदेखि बारम्बार काठमाडौं आएर नेपालका नेताहरुसँग भेटघाटलाई बाक्लो बनाएका चौथाइवालकै आर्किटेक्टमा अहिले भारतले नेपालसँग सम्बन्ध बढाइरहेको बताइन्छ । चौथाइवाला भारतीय प्रधानमन्त्री नरेन्द्र मोदीका विश्वासपात्र हुन्
प्रतिक्रिया