मोतिपुर झडपमा परी मृत्यु भएका परिवारलाई लुम्बिनी प्रदेश सरकारले एक/एक लाख रूपैयाँ दिने

बुटवल । रूपन्देहीको मोतिपुरमा प्रहरीसँगको झडपमा परी मृत्यु भएका परिवारलाई लुम्बिनी प्रदेश सरकारले राहत स्वरूप जनही एक/एक लाख रूपैयाँ दिने भएको छ ।

बुटवल उपमहानगरपालिका-१७ मोतिपुरमा सुकुम्बासीको नाममा निर्माणाधिन औद्यौगिक क्षेत्रको जग्गा कब्जा गर्न खोज्ने समूह र प्रहरीबीच झडप हुँदा ४ जनाको मृत्यु भएको छ ।

प्रदेश सरकारका प्रवक्ता तथा अन्तरिक मामिला तथा सञ्चारमन्त्री तिलकराम शर्माले सर्वदलीय बैठकको निर्णय अनुसार मृतकको परिवारलाई १/१ लाख रूपैयाँ दिने निर्णय भएको जानकारी दिए । ‘घाइतेहरूको उपचारमा कुनै कमी आउन नदिने पनि निर्णय भएको छ ।
घाइतेहरू धेरै भैरहवाको युनिभर्सल कलेज अफ मेडिकल साइन्सेजमा उपचारत छन् ।

दुई जना प्रहरीलाई हेलिकप्टरमार्फत काठमाडौं पठाइएको छ ।’ घटनामा प्रहरी र सर्वसाधारण गरी ५० भन्दा बढी घाइते भएका छन् । घटनाको आधिकारिक जानकारी दिन जिल्ला प्रशासन कार्यालय रुपन्देहीले अहिले चार बजे पत्रकार सम्मेलनको आयोजना गरेको छ ।