पर्वत । चाडपर्व सुरु भएसँगै जुवातास खेल्ने क्रम पनि बढेको छ । प्रहरीको आँखा छलि जुवातास खेल्नेहरुले सदरमुकाबाट बाहिर जुवा खेल्ने अड्डा बनाउन थालेका छन् । प्रहरीले एकै दिन पर्वतको कुश्मा र धादिङमा जुवाको अड्डामा छापा मारेर १७ जना जुवाडेलाई पक्राउ गरेको छ ।
आज बिहानै कुश्मा नगरपालिका-७ खरेहा बस्ने गोबिन्द अधिकारीको घरमा तास खेलिरहेको अवस्थामा सोही ठाउँ बस्ने ५६ वर्षीय जित बहादुर सुनार लगायत ८ जनालाई प्रहरीले पक्राउ गरेको छ । उनको घरमा जुवातास खेलिरहेको भन्ने खबर प्राप्त हुनासाथ जिल्ला प्रहरी कार्यालय पर्वतबाट खटिएको प्रहरीले उनीहरुलाई ९ लाख ५८ हजार ७ सय ४१ रुपैयाँ र ४ बुक तास सहित फेला पारी पक्राउ गरेको पर्वत प्रहरीले जनाएको छ ।
त्यस्तै धादिङ थाक्रे गाउँपालिका-७ जुगेखोलास्थित ऋषि सुबेदीको चिया पसलमा तास खेलिरहेको अवस्थामा सोही ठाउँ बस्ने ४० वर्षीय रामेश्वर कुँवर लगायत ९ जनालाई प्रहरीले पक्राउ गरेको छ । उक्त पसलमा जुवातास खेलिरहेको भन्ने सूचनाको आधारमा ईलाका प्रहरी कार्यालय खानीखोला र प्रहरी चौकी महादेवबेशीबाट खटिएको प्रहरीले उनीहरुलाई नगद ४५ हजार रुपैयाँ र तास सहित फेला पारी पक्राउ गरेको हो ।
पक्राउ परेका जुवाडेहरुलाई जुवा ऐन बमोजिम अनुसन्धान भईरहेको प्रहरीले जनाएको छ ।
प्रतिक्रिया