प्रधानन्यायाधीशलाई नेपाल बारको ५ दिने अल्टिमेटम, इजलासमा नबस्न माग

काठमाडौं । प्रधानन्यायाधीश चोलेन्द्र शमशेर जबरालाई राजीनामाका लागि नेपाल बार एशोसिएसनले ५ दिने अल्टिमेटम दिएको छ । शुक्रबार बसेको नेपाल बारको कार्यसमितिको बैठकले ५ दिनभित्र राजीनामा दिएर मार्ग प्रसस्त गर्न अल्टिमेटम दिएको हो । बैठकले आइतबारदेखि बुधबारसम्म कालो पट्टी बाँधेर सर्वोच्च अदालतमा विरोध कार्यक्रम गर्ने निर्णय गरेको उपाध्यक्ष अधिवक्ता रक्षा बस्यालले जानकारी दिइन् ।

बारले आह्वान गरेको आन्दोलनमा सक्रिय सहभागिता जनाउन उपत्यकाका कानुन व्यवसायीहरुलाई आग्रह गरिएको उनले बताइन् ।

बस्यालका अनुसार बुधबार सम्मपनि राजीनामा नआए थप सशक्त विरोध कार्यक्रम घोषणा बारको बैठकले निर्णय गरेको छ । बारले प्रधानन्यायाधीस जबराले विकृति, विसंगति, भ्रष्टाचार रोक्न नसकेको तथा न्यायपालिकाको गरिमा कायम गर्न नसकेकाले राजीनामा दिन भनेको छ । प्रधानन्यायाधीशलाई सर्वोच्चको इजलासमा बसेर आदेश वा फैसला नगर्न समेत बारले माग गरेको छ ।