१६ महिनाका लागि जीवनबहादुर शाही बने कर्णाली प्रदेशको मुख्यमन्त्री

सुर्खेत । कर्णाली प्रदेशमा सौहार्दपूर्णरुपमा सत्ता हस्तान्तरण भएको छ । पूर्व भद्र सहमती अनुसार माओवादी केन्द्रका नेता महेन्द्र बहादर शाहीले नेपाली काँग्रेसका जीवनबहादुर शाहीलाई मुख्यमन्त्रीको पद हस्तान्तरण गरेका छन् । सहमति अनुसार शाहीले राजीनामा दिएपछि राजीनामा दिएका शाही सहितको समर्थनमा जीवनबहादुर शाही कर्णाली प्रदेशको मुख्यमन्त्री बनेका हुन् ।

आज साँझ मुख्यमन्त्रीमा नियुक्त भएका शाहीले कर्णाली प्रदेश सरकारको नयाँ मुख्यमन्त्रीका रूपमा मंगलवार राति पद तथा गोपनीयताको सपथ लिएका छन् । प्रदेश प्रमुख गोविन्दप्रसाद कलौनीले शाहीलाई पद तथा गोपनीयताको शपथ गराएका छन् । उनी नेपाली काँग्रेस, नेकपा (माओवादी केन्द्र) र नेकपा (एकीकृत समाजवादी)सहितको गठबन्धनको समर्थनमा मुख्यमन्त्री बनेका हुन् । शाहीले १६ महिना प्रदेश सरकारको नेतृत्व गर्नेछन् ।

नेपालको संविधान २०७२ को धारा १६८ (२) अनुसार मुख्यमन्त्रीमा शाहीले नेकपा माओवादी केन्द्र, नेकपा एकीकृत समाजवादीको समर्थनमा दाबी पेस गरेका थिए । एमाले र मओवादी अलग भएपछि गत वैशाख ३ मा मुख्यमन्त्री पदमा माओवादी नेता शाहीले विश्वासको मत लिँदै गर्दा भएको सहमति अनुसार महेन्द्रबहादुर शाहीले उनलाई सहज रूपमा सत्ता हस्तान्तरण गरेका हुन् ।