चितवन । चितवनमा जारी नेकपा एमालेको १० औं महाधिवेशनको निर्वाचन तालिका पछाडी सरेको छ । निर्धारित समयभन्दा ५ घण्टा ढिला सुरु भएको बन्दसत्रमा अध्यक्ष केपी ओलीले लामो भाषण गरेपछि पूर्व निर्धारित निर्वाचनको कार्यक्रम आइतबारका लागि सरेको हाे । निर्वाचन समितिले शनिबार साँझ ६ः३० बजे मतदाता नामावली प्रकाशन गर्ने कार्यक्रम सार्वजनिक गरेको थियो ।
बन्द सत्र ढिला गरि सुरु भएका कारण निर्वाचन कार्यक्रम पछि सारिएको ओली निकटका नेताहरुले बताएपनि ओलीले नाम प्रस्ताव गर्ने र बन्द सत्रले ताली पड्काएर अनुमोदन गराउने योजना सफल हुने नदेखिएपछि कार्यक्रम पछि सारिएको एमालेका एक केन्द्रीय नेताले बताए । बन्दसत्रमा उपस्थित ओली पक्षका प्रतिनिधिहरुले पदाधिकारी र केन्द्रीय समितिको नाम प्रस्ताव गर्ने अधिकार ओलीलाई दिने पक्षमा आवाज उठाएपछि उपाध्यक्ष भिम रावल लगायतले विरोध जनाएको ती नेताले बताए ।
रावलले विधानसम्मतरुपमा निर्वाचन कार्यक्रम अनुसार बन्दसत्र अगाडी बढाउनु पर्ने बताएका छन् । विपक्षीमा उम्मेदवारी नदिए स्वतः सर्वसम्मत हुने, तर उम्मेदवारी दिने प्रतिनिधिको अधिकारलाई नै रोक्न नहुने रावलले बताएका छन् ।
रावलले उम्मेदवारी दिने अडान कायम राखेपछि एमाले अध्यक्ष ओलीले आइतबार बिहान १० बजे सुरु हुने बन्दसत्रमा आफुले नाम प्रस्ताव गर्ने र त्यसमा चित्त नबुझे उम्मेदवारी दिने अधिकार नखोसिने बताए । ‘सहमति हुन नसकेको ठाउँमा निर्वाचन हुन्छ । कोही साथीहरु सहमतिमा तयार हुनुहुन्न र म यो पदमा पुग्छु भन्नुहुन्छ भने पाइन्छ,’ उनले भने, ‘भीम रावलजीले म अध्यक्षमा उठ्छु, म फिर्ता लिन्न भन्नुभयो । मनोनयन नै गर्नुभएको छैन के को फिर्ता लिने रु मनोनयन गर्नुभयो भने फिर्ता लिने नलिने गर्नुहोला ।’
प्रतिक्रिया