काठमाडौं । नेकपा (माओवादी केन्द्र)ले राष्ट्रिय सम्मेलनका लागि प्रतिनिधिको संख्या टुङ्ग्याएको छ । शुक्रबार बसेको स्थायी कमिटी बैठकले देशभरीबाट चुनिएर आएका प्रतिनिधिहरुमा १० प्रतिशत मनोनित गरेर सम्मेलनको प्रतिनिधिको संख्या टुङ्याएको हो ।
बैठक पछि पत्रकारहरुसँग कुरा गर्दै पार्टी प्रवक्ता कृष्णबहादुर महराले नियमित प्रक्रियाबाट आएका १४८३ र त्यसको १० प्रतिशत मनोनयन गर्ने स्थायी कमिटीले निर्णय गरेको जानकारी दिए । प्रतिनिधि मनोनयनको जिम्मा बैठकले पार्टी अध्यक्ष प्रचण्डलाई दिइएको प्रवक्ता महराले बताए । माओवादी केन्द्रले कुल छानिएर आएको संख्याको ५ प्रतिशत केन्द्रीय कमिटीले थप गर्ने भनिएपनि प्रतिनिधि बन्ने आकाँक्षिहरुको संख्या ठुलो देखिएपछि त्यसलाई बढाएर १० प्रतिशतमा पुर्याएको हो ।
नयाँ निर्णय अनुसार १० प्रतिशत मनोनयन गर्दा १ सय ४८ जना प्रतिनिधि छानिने छन् । माओवादीले यसअघि सम्मेलनमा १५ सय ३३ प्रतिनिधि हुने भनेको भए पनि अब त्यो संख्या १६ सय ८ हुने भएको छ ।
आज प्रतिनिधिको संख्या टुङ्याएर सकिएको बैठक शनिबार फेरि बस्ने महराले जानकारी दिए । शनिबारको बैठकमा अध्यक्ष प्रचण्डले पेश गरेको राजनीतिक दस्तावेजमाथि छलफल हुने बताइएको छ । नेकपा माओवादीको राष्ट्रिय सम्मेलन यही पुस ११–१३ मा काठमाडौमा हुँदैछ ।
प्रतिक्रिया