बाग्लुङ । बाग्लुङमा हात्तीपाइले रोग अझै नियन्त्रणमा आउन सकेको छैन । हात्तीपाइले रोगविरुद्धको निःशुल्क औषधि खुवाउने कार्यक्रम १२ औँ पटक सञ्चालन भए पनि रोग नियन्त्रण नभएको हो ।
अभियानको क्रममा औषधि घरमा खाने भन्दै लैजाने तर नखाने तथा मुखमा राखे पनि ननिल्ने गर्दा रोग नियन्त्रणमा कठिन भएको स्वास्थ्य कार्यालय बाग्लुङका प्रमुख सुरज गुरौले जानकारी दिए । बाग्लुङको बाग्लुङ नगरपालिका-१४ नारायणस्थान र जैमिनी नगरपालिका–१ कुश्मीसेरामा हात्तीपाइले रोगका बिरामी बढी छन् ।
नारायणस्थान क्षेत्रका केही स्थानीयले धार्मिक मान्यता, औषधिको साइड इफेक्ट हुने जस्ता डरले औषधि खाना तयार नहुँदा समस्या भएको छ । सो क्षेत्रमा अनिवार्य औषधि सेवनको लागि स्वास्थ्य कार्यालयले स्थानीय तहसँग समन्वय गरी हात्तीपाइले रोगविरुद्धको औषधि खाएको कार्ड लागु गर्ने तयारी गरेको कार्यालय प्रमुख गुरौको भनाइ छ ।
कोरोनाको खोप कार्ड जस्तैं नारायणस्थानका स्थानीयलाई सार्वजनिक सेवा प्राप्तको लागि हात्तीपाइलेकाे औषधि सेवनको कार्ड अनिवार्य गर्ने तयारी भएको उनको भनाइ छ । गत बर्ष जिल्लामा अन्तिम पटक भनेर अभियान चलाए पनि परीक्षण गर्दा फेरि अभियान सञ्चालन गर्नु पर्ने देखिएको हो । २८ फागुनदेखि जिल्लाव्यापी रुपमा हात्तीपाइले रोगविरुद्धको औषधि खुवाउने अभियान सञ्चालनको तयार भएको जनस्वास्थ्य निरीक्षक लक्ष्मी शर्माले बताइन ।
गत बर्ष औषधि खुवाएको ६ महिनापछि स्वस्थ्य मन्त्रालयको टोलीले सर्वेक्षण गरेको थियो । नारायणस्थान र कुश्मीसेरामा औषधि खुवाएपछि सर्वेक्षण गर्दा फेरि १० जनामा परजिवी पहिचान भएपछि हात्तीपाइले रोग निवारण जिल्ला घोषणा गर्ने लक्ष्य स्थगित बन्यो । कुनै एक ठाउँमा रोग निवारण नहुँदा जिल्लाभर नै औषधि खुवाउनु पर्ने हुन्छ ।
नारायणस्थानका तीन सय जनामा परीक्षण गर्दा आठ र कुश्मीसेराका तीन सयकाे परीक्षणमा दुई जनामा परजिवी भेटिएको थियो । सन् २०१४ मा तीन प्रतिशत रहेको संक्रमण दर सन २०२१ सम्म आई पुग्दा २.६६ प्रतिशतमा सिमित भएकाे थियाे । दुई प्रतिशत भन्दा तल नझरेपछि फेरि औषधि खुवाउनु परेको जनस्वास्थ्य निरीक्षक शर्माको भनाइ छ ।
प्रतिक्रिया