खुट्टाको शल्यक्रिया गर्दा मृत्यु भएपछि बुटवल स्थित तिनाउ अस्पताल घेराउ

बुटवल । बुटवलको तिनाउ इन्टरनेसनल अस्पतालमा खुट्टाको शल्यक्रिया गर्दा एकजनाको मृत्यु भएपछि आफन्तहरुले डाक्टरको लापरवाही भएको भन्दै बुटवल स्थित तिनाउ ईन्टरनेशनल अस्पताल घेराउ र नाराबाजी गरेका छन् ।

पश्चिम नवलपरासीको बर्दघाट नगरपालिका-११ भगजोगनीका ४२ वर्षिय ताराप्रसाद चौधरीको देब्रे खुट्टाको शल्यक्रियाका क्रममा बुधबार बिहान मृत्यु भएपछि उनका आफन्तले अस्पताल घेराउ गरेका हुन् ।

अस्पतालका डाक्टरको लापरवाहीले ताराप्रसादको मृत्यु भएको भन्दै मृतकका आफन्तहरुले घटनाको छानवीन, दोषीलाई कारवाही र क्षतिपुर्तिको माग गर्दै अस्पताल घेराउ गरेका हुन् । मृतकका आफन्तले माग पूरा नभएसम्म शब नबुझ्ने समेत अडान लिएका छन् ।

सोमबार अस्पताल भर्ना भएका चौधरीलाई मंगलबार सांझ साढे ५ बजेपछि शल्यक्रिया कक्षमा लगिएको थियो । ताराप्रसादको डा. योगेन्द्र अग्रहरी नेतृत्वको टिमले शल्यक्रिया गरेका हुन् । ३-४ घण्टामा अप्रेसन सकिन्छ भनिएको तर राति ११ बजे मात्रै शल्यक्रिया थियटरबाट सिधै आईसीयूमा लगिएको थियो । विरामीको अवस्था बारे शंका लागेर सोध्दा अवस्था नर्मल छ आत्तिनुपर्दै भनेको तर बिहान ५ बजेतिर बोलाएर अवस्था सिरियस रहेको जानकारी दिइएको मृतकका भान्जा नाता पर्ने आफन्त हेमलालले बताए । आफन्तलाई भेट्न समेत नदिई भेन्टिलेटर लगिएको आफन्तको आरोप छ ।

४ वर्ष अघि दुर्घटनामा खुट्टा भांचिएकाले ताराप्रसादको खुट्टामा रड राखिएकोमा रडको नट भांचिएपछि शल्यक्रिया गर्न भर्ना भएका थिए । शल्यक्रिया अघि गरिएको एक्सरेमा रड भांचिएको नदेखिएको तर पछि रड भांचिएको भनिएको हेमलालले बताए ।

घटनाबारे अस्पताल प्रशासनसंग पटक पटक सम्पर्क गर्दा फोन रिसिभ गरेका छैनन् । अस्पतालमा सुरक्षाका लागि प्रहरी तैनाथ गरिएको छ ।