काठमाडौं । आज नेपाल कम्युनिस्ट पार्टीको स्थापना दिवस । विश्व कम्युनिष्ट आन्दोलनका नेता भ्लादिमिर लेनीनको जन्मदिन पारेर नेपालका तत्कालिन कम्युनिष्ट नेताहरुले २२ अप्रिल १९४९ मा भारतको कलकत्तामा पुगेर नेपाल कम्युनिष्ट पार्टी गठन गरेका थिए ।
जहानियाँ राणा शासनकै समयमा २००६ बैशाख ९ गते पुष्पलाल श्रेष्ठको अगुवाईमा नरबहादुर कर्माचार्य, निरन्जन गोविन्द बैद्य, नारायण विलास जोशीले नेपालमा पहिलोपल्ट नेपाल कम्युनिस्ट पार्टीको स्थापना गरेका थिए । कलकत्तामै बसेको पहिलो बैठकबाट पुष्पलाल पार्टीका महासचिव बनेका थिए ।
टुटफुट र विभाजनको चरण पार गर्दै २०७९ सम्म आईपुग्दा नेपालमा कम्युनिष्ट नाम जोडिएका दर्जन बढी कम्युनिष्ट पार्टीहरु रहेका छन् । त्यस मध्य धेरै पार्टीहरुले आफ्नै पार्टीलाई मुल प्रवाहको दाबी समेत गर्दै आएका छन् । २०४६ को जनआन्दोलनपछि नै नेपालमा कम्युनिस्ट आन्दोलनले गति पाएको थियो । नेकपा एमालेले शान्तिपूर्ण संसदीय धार र तत्कालीन नेकपा माओबादीले हिंसात्मक आन्दोलनको नेतृत्व गरेका थिए ।
२०७४ को आमचुनावमा यी दुई पार्टी एकीकरणसहित चुनावी मैदानमा होमिए । जसमा नेपाल कम्युनिस्ट पार्टीले करिव दुई तिहाई मत पाएको थियो । त्यही मतका आधारमा केपी शर्मा ओली प्रधानमन्त्री बनेका थिए । तर एकीकरणको तीन वर्ष नपुग्दै पार्टीमा विभाजन आयो र अदालतको आदेशमा जुटेका २ पार्टी परानै अवस्थामा फर्के ।
स्थानीय चुनावको व्यस्तताका कारण यस वर्ष कम्युनिष्ट पार्टीहरुले औपचारीक कार्यक्रम घोषणा गरेका छैनन् । एमालेले स्थापना दिवसकै दिन पारेर आफ्नो चुनावी घोषणापत्र सार्वजनिक गर्दै छ भने आजै नयाँ पार्टी कार्यालयमा सर्ने समेत जनाएको छ । माओवादी केन्द्रले पनि सम्बभवत आजै घोषणापत्र सार्वजनिक गर्न सक्ने बताइएको छ ।
प्रतिक्रिया