बुटवल । निर्वाचनको माहोल भाड्ने गरी गठबन्धन दलहरुका कार्यकर्ताहरु कुटपिट र तोडफोडमा उत्रिएको एमालेले आरोप लगाएको छ । सत्ता र शक्तिको आडमा विपक्षी उम्मेदवारहरुलाई कुटपिट गर्ने, सवारी साधन माथी तोडफोडमा गठबन्धनका कार्यकर्ताहरु उत्रिएका अनिहरु माथी आरोप छ।
गएराती रुपन्देहीको देवदहमा नेकपा एमालेको चुनाव प्रचार सामग्री तथा सवारीमाथि गएराती तोडफोड भएको छ । देवदह-१० चरङ्गेमा नेपाली काँग्रेसका कार्यकर्ताद्वारा प्रचार सामग्री तथा सवारीमा तोडफोड भएको एमालेको आरोप छ ।
शनिबार राती करिब १२÷१ बजेको समयमा सडक लाइट तोडफोड गर्नुका साथै स्थानीयले घरअगाडी पार्किङ गरेका राखेका अटो रिक्सामा धारिलो हतियार प्रहार गरिएको छ । स्थानीय बुद्धिमाया गोलेको घरमा पार्किङ गरेर राखिएको ना २ ह ६७२ नम्बरको अटो रिक्सा र उक्त रिक्सामा टाँसिएको नेकपा एमालेको प्रचार सामग्रीमा धारिलो हतियार प्रहार गरिएको छ । यसैगरी सोही ठाउँका स्थानीय सोमबहादुर खड्काको लु १ ह २५५६ नम्बरको अटो रिक्सामा समेत आक्रमण भएको पीडिहरुले बताएका छन् ।
योजनाबद्ध रुपमा मध्यरातमा आक्रमण गरिएको भन्दै नेकपा एमाले देवदह नगरकमिटीले घटनाप्रति आपत्ति जनाएको छ । स्थानीय तथा पीडित बुद्धिमायाका अनुसार शनिबार मध्य रातसम्म स्थानीय एक काँग्रेस नेताको घरमा भोज–भतेरसहित चर्को स्वरमा नाचगानको कार्यक्रम समेत भएको थियो । उक्त कार्यक्रम लगत्तै सडकमा राखिएको लाइटमा तोडफोड गरी स्थानीयले घरमा पार्किङ गरेर राखेका अटो रिक्सामा धारिलो हतियारले आक्रमण भएको थियो ।
नेकपा एमालेको तर्फबाट देवदह-१० को वडा अध्यक्ष उम्मेदवार मनकुमार कनौजे मगरका अनुसार विपक्षी दलहरुले हारको मानसिकताले आक्रमण भएको हो । घटनापछि आइतबार विहान सञ्चारकर्मीहरुसँग बोल्दै उनले गृहमन्त्री बालकृष्ण खाँणकै गृह जिल्लामा मतदाता तथा आम नागरिकहरुले सुरक्षाको प्रत्याभूत गर्न नपाउनु दुःखद भएको गुनासो गरे । ‘विपक्षी दलहरुले हारतको मानसिकतामा राजनीतिक प्रतिशोधका आधारमा गतिविधि गरेका छन् ।’-कनौजे मगरले भने, ‘विपक्षीको यो गतिविधिले जनस्तरमा त्रासको स्थिती सिर्जना भएको छ । सुरक्षा निकायलाई सुरक्षाको प्रत्याभुत गराउनका लागि आग्रह गर्न चाहान्छु ।’
प्रतिक्रिया