काठमाडौं । सरकारले धिरजप्रताप सिंहलाई प्रहरी महानिरीक्षक (आईजीपी)मा बढुवा गरेको निर्णय विरुद्ध प्रहरी अतिरिक्त महानिरीक्षक (एआईजीपी) विश्वराज पोखरेलले सर्वोच्च अदालतमा रिट दायर गरेका छन् ।
पोखरेलको तर्फबाट आज सर्वोच्चमा अधिवक्ता सुनिता रावतले रिट दायर गर्दै सरकारले गरेको बढुवाको निर्णय यथास्थितिमा राख्न माग गरेका छन् । पोखरेलले अदालतबाट न्याय निरुपण नभएसम्म आफुलाई कायममुकायम आईजीपीको रुपमा काम गर्न दिनुपर्ने मागदाबी पनि गरेका छन् ।
पोखरेलको रिट निवेदनलाई सर्वोच्च प्रशासनले दर्ता गरेको छ । रिटमाथि प्रारम्भिक सुनुवाइ बुधबार हुने भएको छ ।
पोखरेलले रिटमा जेष्ठता, कार्यसम्पादन मूल्यांकन, शैक्षिक योग्यता, तालिम, पुरस्कार, कमाण्डलगायत सबै आधारमा आफू अगाडि रहेको दाबी गर्दै सिंहलाई बढुवा गर्ने मन्त्रिपरिषदको निर्णय बदर गर्न माग गरेका छन् । प्रहरी नियमावली२०७१ को नियम ४१ र ३० अनुसार महानिरीक्षकमा आफ्नो बढुवा हुनुपर्ने उनको माग रहेको छ ।
रिटमा पोखरेलले एआईजीसम्म आइपुग्दा आफुले कुनै विभागीय कारवाही नभोगेको पनि जिकिर गरेका छन् ।
आइतबार बसेको मन्त्रिपरिषद बैठकले एआईजी सिंहलाई आईजीपीमा बढुवा गर्ने निर्णय गरेको थियो ।
प्रतिक्रिया