चितवन । नेपाली कांग्रेसका वरिष्ठ नेता रामचन्द्र पौडेलले भरतपुर महानगरपालिकाको मेयरमा स्वतन्त्र उम्मेदवारी दिएका कांग्रेस नेता जगन्नाथ पौडेललाई भेट गरेका छन् ।
सत्ता गठबन्धनले आज भरतपुरमा गर्न लागेको चुनावी सभाअघि रामचन्द्रले मेयरमा बागी उम्मेदवारी दिएका जगन्नाथसँग कुराकानी गरेका हुन् । जगन्नाथले कांग्रेसले भरतपुरको मेयर पाउनुपर्ने अडान राख्दै आएका थिए । माओवादी केन्द्रका रेणु दाहालले गठबन्धनको तर्फबाट मेयरमा उम्मेदवारी दिएपछि जगन्नाथले पनि स्वतन्त्र रुपमा उम्मेदवारी दिएका छन् ।
वरिष्ठ नेता पौडेलले उम्मेदवारी फिर्ताको घोषणा गरेर गठबन्धनको निर्णयलाई सम्मान गर्न जगन्नाथलाई आग्रह गरेका छन् । जगन्नाथले भने आफुले उम्मेदवारी फिर्ता नलिने बरु रेणुलाई फिर्ता लिन लगाउनुपर्ने बताएका छन् । सिराइचुली होटलमा पौडेलले जगन्नाथसहित उनको प्रस्तावक कृष्णलाल सापकोटा र समर्थक मिना खरेललाई पनि सँगै भेट गरेका हुन् ।
कांग्रेसले बागी उम्मेदवारी फिर्ता नलिनेलाई पार्टीबाट कारवाही गर्ने निर्णय गरिसकेको छ ।
प्रतिक्रिया