नेपालगन्ज । बाँकेमा छिटफुट घटनाहरु बाहेक स्थानीय तहको निर्वाचन शान्तिपूर्णरुपमा सम्पन्न भएको छ । बिहान ७ बजेबाट सुरु भएको मतदान केही मतदान केन्द्रहरुमा साँझ ७ बजे सम्म चलेको थियो भने अधिकांस स्थानमा ६ बजे सम्ममा मतदानको काम सकिएको थियो ।
मतदान सम्पन्न भएसँगै जिल्लाका आठवटै पालिकामा मतगणनाको तयारी गरिएको जिल्ला निर्वाचन कार्यालयले जनाएको छ । मतगणनाको कार्यबिधि ‘सम्बन्धित पालिकामै निर्वाचन अधिकृतका कार्यालयले तय गर्ने व्यवस्था रहेको जिल्ला निर्वाचन अधिकारी रमा पन्तले बताईन् । आयोगले ताकेको बिधि पद्दतीमा रही सर्वदलीय सहमतीमा निर्वाचन अधिकृतको कार्यालयले गणनाको प्रारम्भ गर्ने उनले बताईन् ।
बाँकेमा एकमात्र उपमहानगर नेपालगन्जको मतगणना भेरी प्राविधिक शिक्षालयमा हुँदैछ भने कोहलपुर नगरपालिकाको मतगणनाका लागि नगरपालिकाको सभाहललाई मतगणनास्थल तोकिएको छ ।
राप्तीसोनारी गाउँपालिकाको मतगणना गाउँपालिका कार्यालय परिसरमा गरिएको छ भने डुडुवा गाउँपालिकाको मतगणना वनकट्टीमा रहेको श्री माध्यमिक विद्यालयमा गरिने निर्वाचन अधिकृत फटिकराम मुडवरीले जानकारी दिएका छन् ।
नगरउन्मुख खजुरा गाँउपालिकाको मतगणना कपास विकास समितिको सभाहलमा गर्ने तयारी गरिएको छ । त्यसैगरि नरैनापुर गाउँपालिकाका निर्वाचन अधिकृत रेशम आचार्यले गाउँपालिका कार्यालय नजिकैको विद्यालयमा मतगणना गरिने जानकारी दिए । बैजनाथ गाउँपालिकाको मतगणना प्रभात मावि जी गाउँमा हुनेछ भने जानकी गाउँपालिकाको लागि गाउँपालिका कार्यालयमा रहेको सभाहललाई मतगणनास्थल तोकिएको छ ।
नेपाली सेना, सशस्त्र प्रहरी र नेपाल प्रहरीको सुरक्षा घेरामा मतपेटिकाहरु मतगणनास्थलमा ल्याउने क्रम जारी रहेको जिल्ला प्रहरी कार्यालय बाँकेले जनाएको छ ।
प्रतिक्रिया