चितवन । भरतपुर महानगरपालिकाको मेयरमा फेरि पनि रेणु दाहालको जित सुनिश्चित जस्तै बनेको छ । २८ हजार १९५ मत गणना हुन बाँकी छँदा पाँच दलीय गठबन्धनबाट मेयर पदमा उम्मेदवार भएकी माओवादी केन्द्रकी दाहालले ३९ हजार ४१६ मत प्राप्त गरेकी छन् ।
दाहाललाई पछ्याईरहेका नेकपा एमालेका विजय सुवेदीले ३० हजार ६६० मत प्राप्त गरेका छन् । भरतपुरमा एक लाख २७ हजार ८३९ मत खसेकोमा हालसम्म ९९ हजार ६४४ मतगणना सकिएको छ ।
वडा नम्बर ४ को मतगणना देखि नै लगातार अग्रता लिँदै आएकी दाहालले आठ हजार ७५६ मतान्तरले अगाडि छिन् । अहिले भरतपुर–२१ र २२ को मतगणना भइरहेको छ । दुवै वडामा गठबन्धनका उम्मेदवार अगाडि छन् । सात वटा वडाको मतगणना गर्न बाँकी छ ।
मतगणनामा देखिएको अधिकांस दृष्यमा एमालेका वडा अध्यक्षका उम्मेदवारले पाएको भोट एमालेकै मेयरका उम्मेदवार सुवेदीले पाएका छैनन् । एमालेको गढ मानिएको वडामा नै मेयरमा दाहाललाई दिएर बाँकी पदमा एमालेका उम्मेदवारलाई मत दिएको पाइएको छ ।
कांग्रेसका बागी उम्मेदवार जगन्नाथ पौडेलका कारण पनि रेणु दाहाललाई जित्न सहज भएको विश्लेषकहरुको भनाई छ । पौडेलले अहिलेसम्म १२ हजार ८१० मत ल्याएका छन् । असन्तुष्ट कांग्रेसीबाट सुवेदीलाई जान सक्ने मत पौडेलले रोकेको उनीहरुको तर्क छ ।
मेयरमा सुवेदीलाई दाहालले धेरै मतान्तरले पछाडि पारे पनि माओवादी केन्द्रले पाएको वडा अध्यक्ष पद भने जित्न सकेको छैन । रेणले अग्रता लिएपनि अहिले सम्मको गणनमा माओवादीले भरतपुरको एउटा मात्रै वडा जितेको छ ।
उपमेयरमा गठबन्धनका उम्मेदवार नेपाली कांग्रेसका चित्रसेन अधिकारीले ४१ हजार ६६७ मत ल्याएका छन् । उनका निकटतम प्रतिस्पर्धी राप्रपाकी हिमला गुरुङले २४ हजार २६७ मत ल्याएकी छन् ।
प्रतिक्रिया