काठमाडौं । नेपाल नागरिक उड्डयन प्राधिकरणले हवाई उड्डयन क्षेत्रमा हड्ताल र निषेध गर्न नपाईने स्पष्ट पारेको छ ।
वायुसेवा कम्पनीहरुले भोलिदेखि हवाई उड्डयन ठप्प पारेर आन्दोलनमा उत्रिने चेतावनी दिएलगत्तै प्राधिकरणले पत्रकार सम्मेलन गरेर वायुसेवा कम्पनीहरुलाई धाक धम्की नदिन चेतावनी दिएको हो ।
प्राधिकरणले हवाई सुरक्षाका लागि तय गरिएका सबै मापदण्ड पालना गर्न वायुसेवा कम्पनीहरुलाई पुनः निर्देशन समेत दिएको छ । ‘हवाई सुरक्षाका लागि प्राधिकरणले लिएका नियमहरु कार्यान्वयन गर्छ, हवाई क्षेत्र हड्ताल गर्न नपाइने क्षेत्र हो भन्ने कसैले पनि बिर्सनु हुँदैन । धाक धम्की चल्दैन,’ प्राधिकरणका महानिर्देशक प्रदीप अधिकारीले भने ।
प्राधिकरणले जहाज र हेलिकोप्टरको रात्रीकालीन विश्रामका लागि काठमाडौं बाहिरका विमानस्थलहरु तोकेपछि वायु सेवा कम्पनीहरु आक्रोशित भएका थिए । तर, प्राधिकरणले भने यो कुनै कम्पनीलाई मात्र लक्षित गरेर नल्याएको भन्दै सबैका लागि कार्यान्वयन हुने बताएको छ ।
सम्बन्धित समाचार : भोलिदेखि नियमित र आकस्मिक हवाई सेवा ठप्प पार्ने वायुसेवा संचालक संघको चेतावनी
पत्रकार सम्मेलनमा महानिर्देशक अधिकारीले त्रिभुवन अन्तराष्ट्रिय विमानस्थलमा पार्किङको निकै समस्या रहेको जिकिर गर्दै विमानस्थललाई रत्नपार्क जस्तो बनाउन नसकिने जिकिर गरे । अधिकारीले भने, ‘ट्याम्पु जसरी पार्किङ गर्न त्रिभुवन विमानस्थल रत्नपार्क होइन। यो स्ट्यान्डर्ड एयरपोर्ट हो।’
प्रतिक्रिया