नेपालगन्ज । नेपालगन्जको होटल सिटी प्यालेस भित्र सञ्चालनमा रहेको सिटी इ गेमिङ्ग क्लब क्यासिनोबाट ७ जना नेपालीलाई बाँके प्रहरीले पक्राउ गरेकोछ । क्यासिनोमा प्रवेश गरि धम्काउने र गुण्डागर्दी गरेको अभियोगमा ७ जनालाई पक्राउ गरिएको बाँके प्रहरीले जनाएको छ ।
जिल्ला प्रहरी कार्यालय बाँकेबाट खटेको प्रहरी टोलीले नेपालगन्जको धम्बोझी चोकमा रहेको होटल सिटी प्यालेसभित्र सञ्चालित उक्त क्यासिनोबाट ७ जनालाई पक्राउ गरेको हो । क्यासिनोबाट पक्राउ पर्नेमा नेपालगन्जका मनोज विक, विपिन सिंह बडुवाल, गणेश शर्मा, सुलभ कार्की, विक्रम क्षेत्री, आकाश सिंह र मोहित शाह रहेका छन् । उनीहरुलाई आईतबार बेलुका करिब ७ बजे पक्राउ गरिएको हो ।
क्यासिनो भित्र प्रवेश गरि गुण्डागर्दी गर्ने, धम्क्याउने गरेकाले ती ७ जनालाई पक्राउ गरिएको बाँके प्रहरी प्रवक्ता डीएसपी मधुसुदन न्यौपानेले बताए । नेपालको कुनै पनि क्यासिनोमा विदेशीबाहेक नेपालीलाई प्रवेशमा प्रतिबन्ध भएपनि नेपालगन्जमा सञ्चालित क्यासिनोहरु नेपालीहरुलाई लुकाई छिपाई जुवा खेलाउने कार्यमा बदनाम छन् ।
पक्राउ परेकाहरुलाई कानून बमोजिम कारबाही अगाडी बढाइने डिएसपी न्यौपानेले जानकारी दिए ।
प्रतिक्रिया