लुम्बिनी र राप्ती प्रादेशिक अस्पतालमा आजबाट ओपीडी, ईमर्जेन्सी र बेड चार्ज नलाग्ने, लुम्बिनीमा रगत पनि निशुल्क

खबर कुरा
१ श्रावण २०७९, आईतवार
                 

बुटवल । लुम्बिनी प्रदेशका दुईवटा सरकारी अस्पतालमा आजबाट निशुल्क ओपीडी, निशुल्क ईमर्जेन्सी र निशुल्क बेड सहितको सेवा संचालनमा आएको छ । प्रदेश सरकारले प्रादेशिक अस्पतालमा नागरिकको निशुल्क उपचार सेवा दिन बजेट बिनियोजन गरेसँगै प्रदेशका २ वटा अस्पतालमा निशुल्क सेवा प्रारम्भ भएको हो ।

प्रदेश सरकार मातहतमा रहेको लुम्बिनी प्रादेशिक अस्पताल बुटबल र राप्ती प्रादेशिक दाडमा आजबाट ओपिडी र इमर्जेन्सी टिकट तथा बेड निःशुल्क हुने भएको छ ।

लुम्बिनी प्रदेश सरकारले आर्थिक वर्ष २०७९र८० को वजेटमा लुम्विनी र राप्ती प्रादेशिक अस्पतालमा उपचारका लागि आउने बिरामीहरुलाई ओपिडी र इमर्जेन्सीको टिकट तथा बेडमा शुल्क नलिने घोषणा गरेपछि साउन १ गतेदेखि कार्यान्वयनमा आएको हो ।

प्रदेश सरकारको घोषणा अनुसारको निशुल्क सेवाको आज एक कार्यक्रमकाबीच प्रदेश सरकारका मुख्यमन्त्री कुलप्रसाद केसीले लुम्बिनी प्रादेशिक अस्पताल पुगेर उदघाटन गरे । सो अवसरमा बोल्दै मुख्यमन्त्री केसीले नागरिकलाई सहज, शुलभ र प्रभावकारी स्वास्थ्य सेवा दिने सरकारको लक्ष्य अनुरुप निशुल्क सेवा प्रारम्भ भएको बताए ।

प्रदेश सरकारले चालु आर्थिक वर्षका लागि ओपिडी र बेड निःशुल्क गर्न वजेटमा एक करोड ५० लाख रुपैया बिनियोजन गरेकोछ । ‘टिकट शुल्क नलाग्ने भएपनि विरामीहरुले टिकट काउन्टरबाट टिकट भने लिनुपर्छ’ लुम्विनी प्रादेशिक अस्पतालका मेडिकल सुपरिटेण्डेन्ट डा. इन्द्र ढकालले भने ।

लुम्बिनी प्रादेशिक अस्पतालमा आजैबाट भर्ना भएका बिरामीलाई आवश्यक रगत पनि निशुल्क उपलब्ध हुने डा. ढकालले जानकारी दिए । अस्पतालले यस अघि नै रक्त सञ्चार केन्द्रसँग निशुल्क रगत उपलब्ध गराउने सम्झौता गरिसकेको उनले बताए ।

यसमा तपाइको मत

Your email address will not be published.


*