एसपीपीमा सहभागी नहुने पत्रबारे संसदलाई जानकारी गराउन सरकारलाई सभामुखको रुलिङ

काठमाडौं । सभामुख अग्निप्रसाद सापकोटाले एसपीपी स्वीकार नगर्ने पत्रबारे जानकारी गराउन सरकारलाइृ निर्देशन दिएका छन् ।

बिहीबार बसेको प्रतिनिधिसभा बैठकमा सभामुख सापकोटाले सत्तारुढ र प्रतिपक्षी दलका सांसदहरु एसपीपीको अवस्थाबारे प्रश्न उठाएकाले सरकार स्वयंले गरेको निर्णय र त्यसको कार्यान्वयन अवस्थाबारे जानकारी गराउन निर्देशन दिएका हुन् ।

आजको बैठकमा सत्तापक्षका सांसदहरुल एसपीपीलाई नाम फेरेर कार्यान्वयन गर्ने तयारी भएको भन्दै आपत्ति जनाएका थिए ।

सापकोटाले सांसदहरुले उठाएको प्रश्नमा आफ्ना ध्यानाकर्षण भएको भन्दै सदनलाई जानकारी गराउन रुलिङ गरेका हुन् । सापकोटाले भने, ‘माननीय सदस्यहरुले उठाउनुभएको एसपीपीका सम्बन्धमा मेरो ध्यानाकर्षण भएको छ । सो सम्बन्धमा नेपाल सरकारको निर्णय र त्यसको कार्यान्वयन अवस्थाको सम्बन्धमा सदनलाई जानकारी गराउन नेपाल सरकारलाई निर्देशन गर्दछु । ’

व्यापक जनविरोध र सत्तापक्ष एवं प्रतिपक्षी सांसदहरुको तिब्र आपत्तिपछि सरकारले अमेरिकी सैन्य कार्यक्रम एसपीपीमा सहभागी नहुने पत्राचार गर्ने निर्णय गरेको थियो । तर लामो समय वित्दा पनि परराष्ट्र मन्त्रालयले अहिलेसम्म अमेरिकालाई पत्राचार गरेको छैन ।